Advertisements

Pasku na Passionistas Pop-Up Fair

Pasku na Passionistas Pop-Up Fair

 

Willemstad – Dia 31 di mart Fundashon Passionistas ta organisá e di ocho edishon di Passsionistas Pop-Up Fair den un ambiente di Pasku. Durante e feria lo tin un programa variá pa mucha i hende grandi. E evento lo tumá lugá entre 13:00 pa 18:00 na Hòfi Wayaká ku ta situá na Weg naar Welgelegen 64.

Pa e edishon aki, Fundashon Passionistas ta kolaborá ku Fundashon Birgen di Rosario pa duna mas atenshon na grandinan.  Fundashon Birgen di Rosario lo ta presente na e feria pa duna informashon tokante e servisionan ku nan ta ofresé na grandinan. E fundashon ta bai bende produktonan pa generá fondo. Passionistas lo krea espasio pa 25 klientenan di Fundashon Birgen di Rosario ku ta bai haña lès di pinta bou di guia di Yrzah Eisden. Riba dia 31 di mart Yrzah Eisden ta lansá su proyekto ‘We Art One’, kaminda tur siman Yrzah i boluntarionan ta duna lès di pinta na grandinan.

Apesar di esei, durante e feria empresarionan i hòbiista lo bende diferente produktonan artesano, obra di man, kuminda i kos di bebe. Pa muchanan lo bai tin un workshop kreativo i nan por partisipá grátis na e Easter Egg Hunt na Hòfi Wayaká. Los Inexplicables ta bai toka müzik karibense i Le Atelier ta presentá un ‘fashion showcase’ di asesorionan. Sabrina Schoop tambe ta deklamá su poesianan. Entrada di e feria ta Naf 5 pa adulto i grátis pa muchanan te ku 12 aña.

Por lo último, JenPenCreative Studio i Blue 33 Woodworks ta duna un workshop kreativo pa adulto. Durante e workshop hende ta siña traha nan mes stul i mesa di palu. Registrashon pa e workshop ta posibel dor di manda un email na jenpen@jenpencreative.studio.

Fundashon Passionistas ta organisá eventonan i partisipá na proyektonan ku ta ofresé personanan kreativo i ku pashon pa nan talento un plataforma i e posibilidat pa ‘netwerk’ i kolaborá. Pa mas informashon tokante e filosofia di Fundashon Passionistas, detaye di e feria i pa un impreshon di e otro edishonnan, por bishitá e página di Facebook: www.facebook.com/passionistascommunity. Òf por yama e number di telefòn 517-6513 i manda un imeil na info.passionistas@gmail.com.

Advertisements
error: Content is protected !!
%d bloggers like this: