Advertisements

Orashon djasabra 24 di mart 2018

Orashon djasabra 24 di mart 2018

‘Hopi hende ku a bin bishitá Maria i mira kiko Hesus a hasi, a kere den djE. Algun hende a bai konta e fariseonan loke El a hasi. Esei a pone ku saserdotenan importante i fariseonan a reuní ku Konseho Supremo i bisa: ‘E hòmber akí ta hasi hopi milager i nos, kiko nos mester hasi? Si nos lag’é sigui asin’akí, tur hende ta bai kere den dje i e romanonan ta bin kita nos for di nos lugá i nos nashon for di nos.’ Kaifas, ku tabata gransaserdote den e aña memorabel ei, a bisa nan: ‘Usa boso sintí! Boso no ta realisá ku ta kumbiní boso laga ún hende muri, en bes di pèrmití destrukshon di henter pueblo?’ Kaifas mes no a realisá importansia di su palabranan, ma komo gransaserdote den e aña memorabel ei, el a profetisá ku Hesus mester a muri pa henter e pueblo. No solamente pa e pueblo hudiu, ma tambe pa trese tur yu di Dios ku ta plamá, huntu i hasi nan ún. P’esei for di e dia ei e outoridatnan hudiu a traha plan pa mata Hesus. Anto pa e motibu ei Hesus no tabata bia públikamente mas entre e hendenan di Hudea, sino El a bai e region serka di desierto, i fo’i djei El a bai un siudat yamá Efraim. El a keda aya, huntu ku su disipelnan. Fiesta di Pésag, un fiesta hudiu, tabata serka i hopi hende di kunuku tabata subi bai Herusalèm, promé ku e dia di fiesta pa kumpli ku seremonia di purifikashon. Nan tabata buska Hesus pa mira i pará den tèmpel nan tabata puntra otro: ‘Kiko boso ta pensa? Lo e bini fiesta di Pésag?’ ‘ Huan 11:45-56

Advertisements
error: Content is protected !!
%d bloggers like this: