Advertisements

Selikor tambe ta aktivo den Operashon Siman Santu 2018

Selikor tambe ta aktivo den Operashon Siman Santu 2018

 

Selikor e aña akí tambe ta forma parti di e tim multidisiplinario enkargá ku Operashon Siman Santu. Ròl di Selikor en partikular ta pa atendé prinsipalmente ku e gran kantidat di shushi ku aktividatnan na nos playanan lo generá. Lo hasi esaki dor di subi e frekuensia di rekohé shushi.

Ya pa algun aña Selikor a bin ta duna su aporte na Operashon Siman Santu, ku pa aña 2018 ta enkabesá pa Ministerio di Salubridat, Medioambiente i Naturalesa. Meta di e operashon akí ta pa garantisá seguridat i trankilidat pa nos mes hendenan i pa turistanan ku ta bishitá nos playanan durante e wikènt Santu. Den e fin di siman di fiesta akí e asistensia na playanan públiko ta subi konsiderabelmente i ku esaki e retonan pa orden públiko, seguridat, promé asistensia, limpiesa, higiena, i estado di nos kareteranan ta oumentá. Pa e motibu akí diferente organisashon gubernamental i no gubernamental a pone kabesnan huntu i kordiná trabounan ku otro pa e wikènt Santu kana sin suseso lamentabel.

Pa loke ta trata e tareanan di Selikor, komo parti di e totalidat, lo bai subi e frekuensia pa rekohé shushi na diferente playa. Lo pasa na e playanan pa hasi e kònteinernan bashí riba djasabra 31 di mart, djaluna 2 di aprel i djamars 3 di aprel. Banda di e rekohementu di shushi, Ministerio di Salubridat, Medioambiente i Naturalesa a sòru pa Selikor por pone tualèt portátil na algun playa. Selikor lo sòru pa limpia e tualètnan akí riba djasabra 31 di mart i djadumingu 1 di aprel.

Un súplika ta bai na e públiko ku ta bishitá nos playanan pa sali kas ku saku di shushi, benta tur shushi den saku i na final depositá e saku den un kònteiner di shushi na e playa. Evitá di benta shushi riba òf banda di e kònteiner. E shushi ku bo produsí ta di bo i ta na abo pa atendé di forma korekto kuné. Ta nos tur su responsabilidat pa mantené nos playanan públiko limpi i komo bon suidadano ta kada un di nos tin un ròl den esaki. Laga nos ban asumí nos ròl…pasó t’asina ta hende.

Advertisements
error: Content is protected !!
%d bloggers like this: