Advertisements

Gerrit Schotte – MFK: Karta na Minister di Finansa sr. Gijsbertha pa motibu di deklarashon nan kontradiktorio di su kolega Minister Alcala-Walle

Na Minister di Finansa

Sr. Kenneth Gijsbertha

Pietermaai # 17

Presente

 

Kòrsou, 15 di mart 2018
Tópiko: Preguntanan konforme artíkulo 96 na Minister di Finansa relashoná ku karta fecha 7 di mart 2018 di Minister di Enseñansa, Siensia, Kultura i Deporte (ESKD) pa para un reunion públiko ku frakshon di MFK a pidi relashoná ku e medida pa kòrta i/òf eliminá e proyekto di “Enseñansa Liber/Grátis” pa yuda kubri défisit riba presupuesto di 2017 i 2018.

 

Sr. Minister,

 

Frakshon di MFK a tuma nota di e karta numerá 2018/09067 fecha 7 di mart 2018 di bo kolega, ku komo tópiko “Petishon pa un reunion públiko tokante enseñansa liber dor di firmantenan di MFK”. Nos ta pone e karta athunto, por si akaso Minister Gijsbertha no a tuma nota di ekspreshon nan di bo kolega Minister Alcala-Walle.

 

Den e karta ariba menshoná Minister Alcala-Walle ta referí na nos karta fecha dia 16 di febrüari 2018, kaminda nos frakshon ta hasi un petishon konforme artíkulo 64 di Reglamento di Orden pa un reunion públiko, ku komo tópiko “Medida pa kòrta i/òf eliminá e proyekto di Enseñansa Liber/Grátis”.

 

Den e karta Minister di Enseñansa ta relatá diferente motibu ku na su huisio ta motibunan ku lo mester para i/òf presidente di Parlamento no mester pone riba agènda pa tratamentu e petishon di nos frakshon.

 

Nos ta referí tekstualmente na dos frase ku e minister a usa den su karta;

 

Sra. Alcala-Walle;

 

  1. “En bèrdat suskrito ta konfirmá ku den un karta di yanüari último dirigí na CFT tin un pasashi den e karta ku su formulashon a krea un poko konfushon riba e asina yama Enseñansa Liber”.

 

  1. “Den realidat e Minister aktual di Enseñansa no ta na altura di e desaroyonan i echonan verídiko en kuantu Enseñansa Liber”

 

E karta di Minister Alcala-Walle ta trese preokupashon i alabes konsternashon serka frakshon di MFK, esaki debí ku nos ta sali for di e punto di bista ku finansa di Kòrsou ta wòrdu atendé na un manera serio i transparente. Si Minister di finansa a informá Parlamento i CFT di medidanan ku ta bai wòrdu tuma nos komo Parlamento ta sali for di e punto di bista ku e medidanan aki ta karga aprobashon di konseho di Minister i ku kada minister a duna nan kontribushon pa a yega na e medidanan relatá.

 

Pa nos ta un sorpresa ku Minister di Enseñansa den e karta menshoná ta informá Parlamento ku e medida ta un pasashi i ku bo persona a krea konfushon kuné den komunidat.

 

Mas serio ta ku Minister di Enseñansa ta informá den su karta ku e no ta na altura di desaroyonan pa ku eliminashon di Enseñansa Liber. Esaki ta nifiká ku Minister di finansa a mal informá Parlamento i CFT ku ta bai tuma medida relashoná ku  eliminashon di Enseñansa Liber miéntras ku esaki lo no ta bèrdat?

 

Ademas Minister Alcala-Walle ta indiká na Parlamento ku ta apénas awor, SOAB ta hasiendo un investigashon riba enseñansa liber.

 

Esaki ta trese nos na e siguiente preguntanan na Minister di Finansa;

 

  1. Konseho di Minister a aprobá karta emití na CFT pa evitá un “aanwijzing” riba Gabinete Rhuggenaath, indikando 15 medidanan kaminda ku esaki lo spar miónes di florin anualmente den añanan 2018, 2019 i 2020 si òf no?

 

  1. Den e karta bou di Ad1, ta duna aklarashon tokante kon ta bai logra spar 14 mion florin dor di eliminá Enseñansa liber den 3 aña, e proseso aki Minister di Finansa a hasié sin previo konsulta ku Minister Alcala-Walle i e koalishon den su totalidat?

 

 

  1. Lesando e teksto di e karta na CFT kual a wòrdu kompartí ku Parlamento di Kòrsou i lesando e karta di Minister Alcala-Walle na Staten dia 7 di Mart 2018, nos mester konkluí ku e karta di Minister di finansa i spesífikamente Ad1 a krea konfushon i ku e kontenido aki relatá dor di Minister di finansa i konseheronan di Ministerio finansa no tabata karga aprobashon di Minister Alcala-Walle komo esun responsabel pa e kartera di enseñansa?

 

  1. Mirando ku ta e promé medida riba e lista ku Gabinete Rhuggenaath a anunsiá pa evitá un “aanwijzing”, nos kier sa si esaki ta e intenshon ainda òf a kambia di idea òf ta mal a mal informá Parlamento i CFT, manera bo kolega ta bisando nos den un karta?

 

  1. Si lokual bo kolega Minister Alcala-Walle a buta den e karta na Parlamento fecha 7 di Mart 2018 ta kuadra ku bèrdat, nos ke sa di Minister di ken e idea di eliminashon di Enseñansa liber a bini i kon a yega na konsenso pa esaki ta e medida number unu (1) pa a anunsiá na pueblo, Parlamento i CFT?

 

  1. Minister di Finansa ta di akuerdo ku eliminashon di Enseñansa Liber? No opstante ku esaki ta un tarea di Gobiernu ankra den nos Areglo di Estado den artíkulo 21 insiso 8.

 

 

Na nòmber di

Frakshon di MFK,

 

 


Gerrit F. Schotte

Lider di Frakshon MFK

Advertisements
error: Content is protected !!
%d bloggers like this: