Advertisements

Minister Zita Jesus-Leito a hasi apertura Domeinbeheer ta habri Sentro di Servisio

Minister Zita Jesus-Leito a hasi apertura

Domeinbeheer ta habri Sentro di Servisio

Willemstad – Domeinbeheer a habri un Sentro di Servisio den World Trade Center (WTC) djamars 13 di mart. Den e sentro aki e kliente ta risibí servisio den un ambiente mas personal, moderno i kómodo. Dilanti di invitadonan i empleadonan, minister Zita Jesus-Leito di Tráfiko, Transporte i Planifikashon Urbano a hasi apertura ofisial di e sentro, markando asina un paso mas den e proseso di mehorashon di Domeinbeheer. Na e okashon ei tambe a lansa e wèpsait www.domeinbeheer.cw i alabes a selebrá ku Domeinbeheer a kumpli 64 aña dunando servisio na públiko di Kòrsou.

 

Fuera di e echo ku e sentro aki ta moderno i atraktivo, e tin e meta prinsipal pa duna mihó atenshon i sirbi e kliente den su nesesidatnan. Ademas, e tin hopi mas espasio pa por akomodá e kliente. Por ehèmpel por hasi intake di forma profeshonal i kompleto na bali, pero tambe den ofisina, den kaso ku ta rekerí mas privasidat. For di fin di 2017 e Sentro di Servisio di Domeinbeheer a habri den forma no-ofisial, i klientenan ya por a sera konosí ku e manera nobo di traha aki. E reakshonnan ta sumamente positivo.

E Sentro di Servisio ta mas ku solamente un ofisina nobo. Ta trata aki mas bien di henter un aserkamentu nobo i moderno, kaminda e kliente ta sentral. Esaki ta nifiká tambe ku awor ta bai komuniká mas efisientemente i tambe na diferente forma ku e kliente. Banda di usa e wèpsait – ku por sierto pronto lo bai funshoná di forma interaktivo tambe pa medio di un portal – e kliente por yama 0800-1919 pa risibí informashon básiko na telefòn. Den kaso ku e kliente mester di informashon mas amplio òf mas spesífiko, e por pasa libramente na e Sentro di Servisio. Ei tin informashon oudiovisual, digital i por eskrito, kual e por hasi uso di dje miéntras e ta disfrutá di un kòpi kòfi. Un otro inovashon ta ku lo risibí kliente non-stop di 08:00 pa 16:00 or, loke sigur ta fasilitá empleadonan ku por hasi nan diligensianan solamente den nan lunch break.

Domeinbeheer poulatinamente ta ehekutando su vishon pa yega na ekselensia, manera ta delineá den su plan di mas aña “Rumbo pa Ekselensia”. E vishon aki ta enserá ku Domeinbeheer ta mehorá i modernisá su prosesonan interno, su produktonan i su servisionan. Pues e organisashon lo bai traha den un forma mas efektivo i efisiente. Ademas Domeinbeheer lo hasi mihó uso di su rekursonan pa kontribuí mas na desaroyo sosio-ekonómiko di Kòrsou. Poko poko pero sigur, lo por mira mas mehora konkreto, manera awor aki ta e kaso ku e Sentro di Servisio.

 

Advertisements
error: Content is protected !!
%d bloggers like this: