Advertisements

MINISTER DI DESAROYO EKONOMIKO STEVEN MARTINA A REUNI KU ALGUN REPRESENTANTE DI SEKTOR EMPRESARIAL TOKANTE E IMPAKTO DI E SANSHON DI PRESIDENTE VENEZOLANO

MINISTER DI DESAROYO EKONOMIKO STEVEN MARTINA A REUNI KU ALGUN REPRESENTANTE DI SEKTOR EMPRESARIAL TOKANTE E IMPAKTO DI E SANSHON DI PRESIDENTE VENEZOLANO

WILLEMSTAD- Minister di Desaroyo Ekonómiko a yama algun empresario pa partisipá na un deliberashon ku karakter di urgensia pa asina haña un bista di kon nan a keda afektá dor di e desishon resien di presidente Venezolano.

Representantenan di supermerkadonan, importadónan di fruta ku berdura, sektor di energia, zona franka, transporte, turismo, haf i aeropuerto a bin huntu pa deliberá i mobilisá. “Venezuela ta asina serka, pues den un par di ora tin produktonan manera fruta, berdura i piská fresku riba merkado pa nos konsumo” asina un di e empresarionan importadó a trese dilanti.

Pa e motibu aki e desishon resien di e presidente Venezolano pa sera fronteranan tin efekto inmediato riba e fluho di produktonan for di e merkado ei. E supermerkadonan a buska i ta buskando alternativanan riba merkadonan Dominikano i Colombiano: “pero e problema ta e transporte ku ta duru muchu largu i si mester trese e produktonan ku avion esaki ta influensiá e preis di e produktonan”, asina e empresarionan a sigi bisa.
Minister Steven Martina a indiká di ke sinta ku tur importadó pa wak kon di un forma kolektivo por yega na un akuerdo pa trese merkansia i asina mantene e gastunan bou di kontrol.

Un di e konklushonan ku por saka for di e enkuentro aki ta ku empresanan ya tin nan planan di kontingensia i ta aktuando kaba den preparashon pa si e Presidente disidi di prolongá e sanshon. Pero a bin dilanti tambe ku mester kita for di e dependensia di Venezuela i buska otro merkadonan i sera tratadonan ku paisnan pa garantisá kuminda pa nos mes i pa esnan ku ta bishitá nos. Den e kuadro aki Minister Martina a informá ku ya a start kombersashonan pa sera akuerdonan komersial ku Repúblika Dominikana, Colombia i Caricom i ku esaki lo duna nos akseso na mas diversidat di merkado.

Meta primordial di e reunion tabata pa haña un mihó bista kiko ta e impakto real di e desishon aki riba pa nos pais. Pa medio di e reunion aki e Ministerio por a skucha di e diferente kompanianan kiko kada kompania a/ta hasi pa ku e situashon i kiko ta spera di parti di Gobièrnu di Kòrsou.

Minster Martina ta kontentu i gradesido ku e respuesta rápido di e empresanan. E Ministerio lo sigi monitor e situashon i ta sigi prepará pa habri mas merkado i eliminá e dependensia di e merkado Venezolano. “Nos ta keda pendiente pa e resultado riba nivel diplomátiko i di e reunion ku lo tuma lugá na Aruba djabièrnè awor tokante e situashon aki (kaminda Kòrsou, Aruba, Boneiru i Venezuela lo reuní). Kual sea e resultado lo tuma pasonan pa sigurá kontinuidat di e fluho di produktonan alimentisio pa nos merkado.

Advertisements

Leave a Reply

%d bloggers like this: