Advertisements

Diskurso di Aña Nobo di Gezaghebber Edison Rijna

Diskurso di Aña Nobo di Gezaghebber Edison Rijna
Fecha: 11 di yanüari 2018
Ora: 19:00-21:00

Presentenan, kerido pueblo, siudadanonan, mi ke kuminsá na deseá un i tur un Aña Nobo fruktífero i ku e anja aki lo ta miho ku anja pasa pa nos tur. Mi deseo ta pa aun mas nos ban traha HUNTU pa nos kousa komun ku ta bienestar di Boneiru.

Den mi diskurso na komienso di aña mi ke para un ratu ketu na un tendensia eroneo. E tendensia aki ta unu ku nos tin ku laga para pa asina nos por krese komo pueblo.

Hopi di nos tin e tendensia ku ta otro tin ku karga nos responsabilidat òf sea tin e pensamentu ku ta gobièrnu tin tur kos na su enkargo.

Ta opvio ku gobièrnu tin su responsabilidatnan pa karga, i esaki diariamente tin un tim di ambtenarnan ku ta hasi nan máksimo esfuerso pa kumpli ku ne.
Pero komo siudadano ku ta stima su isla, nos kada unu komo parti di e komunidat aki tin nos propio responsabilidat pa karga.
Nos tin nos derechonan i nos tin e tendensia di kòrda riba esakinan so, sin tene na kuenta ku nos tin nos debernan tambe. Por ehèmpel komo suidadano bo tin e derecho di duna bo opinion i na mes momentu bo tin e deber di kuida bo patrimonio i kumpli ku lei.

Nos ke ta independiente den e loke ku nos ke hasi pero na otro banda tin e tendensia ku otro hende mester karga nos responsabilidat. Pa nos ta un komunidat ku ta prosperá nos mester karga responsabilidat. Tin un frase ta bisa: “Libertat, ta nifika responsabilidat. Pa e motibu aki hopi ta teme esaki”

Sinembargo ta hopi importante pa te asina leu ku por, nos a lo ménos PURBA hasi kosnan nos mes, òf sea trata na aktua independiente. Na momento ku nos mes no por lo ta e momento pa buska un partner stratégiko ku ta sea konsehá òf yuda.

Nos ta nos mes doño, nos mes ta determiná kiko nos ke den bida i kiko nos ke logra. Pero nos tin e persepshon ku ta sea gobièrnunan òf otro instansianan tin ku hasi tur kos pa nos pa logra esaki.

A yega tempu pa nos kada un kuminsá pensa den hasi algu di nos mes pa huntu nos sali dilanti pa nos Boneiru. Ta nos ta Boneiru i ta nos tin un poder pa traha huntu pa un mihó Boneiru.
Aki NO ta trata di kritiká, keha i/òf kulpa otro, ma nos kada un mester tin e aktitut pa karga nos responsabilidatnan komo bon siudadano.

Nos mester por demostrá outo determinashon den tur sentido di palabra.
Hasi uso di bo ret sosial òf medionan na bo alkanse pa bo logra bo metanan òf kumpli ku bo deseo. Hasi esaki semper di manera positivo i ku ta yuda otro na mes momentu tambe.

Semper nos mes a determiná e direkshon ku nos ke bai den bida i nos ke mantené esaki tambe.
Si bo por yuda bo mes, esaki tin konsekuensianan positivo pa bo den bo bida sosial, konfiansa propio i tambe pa bo komunidat.

Laga nos meta pa 2018 ta pa nos empodera otro, tuma inisiativa, ser mas empresarial, tuma responsabilidat, Yuda bo mes i traha huntu pa un mihó Boneiru.

Advertisements
%d bloggers like this: