Advertisements

Impreshonante apertura di kas di kuido ‘Grandi na Kuido’ na Tera Kòra

Impreshonante apertura di kas di kuido ‘Grandi na Kuido’ na Tera Kòra

WILLEMSTAD – Djamars atardi 12 di desèmber a tuma lugá apertura ofisial di e kas nobo di kuido pa hende grandi na Tera Kòrá. E kas di kuido aki di awe en adelante ta hiba di nòmber; ‘Grandi na Kuido’. Despues di a rende rèspèt na nos himno i bandera, e maestro seremonia Gibi Bacilio a sede mikrofono na Minister pa Desaroyo Sosial, Labor i Bienestar, Hensley Koeiman. Sr. Koeiman mes ora na su introdukshon a rekonosé presensia di sra. Larmonie-Cicilia, kende durante di e tempu ku e tabata minister di DSLiB, tabatin e onor di a inisiá e proyekto. Sr. Koeiman a kontinuá su diskurso bisando ku el a bishitá e kas di kuido na algun okashon tempu ku esaki tabata den konstrukshon i ku hopi satisfakshon el a mira awe ku e proyekto a konkluí. “Nos grandinan meresé ku nos tur ta pone nos gránito pa nan risibí un kuido adekuá ora nan a yega un edat ku nan tin mester di esaki. Na vários okashon mi a bishitá e sitionan kaminda e grandinan aki di Banda Abou tabata keda. E infrastruktura i fasilidatnan sigur no ta di kompará ku loke nan tin awor,”e titular ku tin e responsabilidat di e ministerio pa Desaroyo Sosial, Labor i Bienestar a bisa. “Tambe mi por bisa ku mi a nota un satisfakshon riba kara di e trahadónan ku awor tin un sitio ideal pa nan bin ehersé nan labornan. Pa no papia mes di e ‘grandinan’ ku manera mi a komprondé ta bisa ku awor nan ta keda den un hotèl.”
Algun otro personanan hopi ligá na e proyekto tambe a hiba palabra. Nan, na nan turno, a gradisí un gama amplio di persona i instansia pa nan trabou balioso ku e soño di un kas di kuido nobo pa e distrito i Banda Abou a bira realidat. Sra. Eustatius, manager di e lokalidat, a konta en breve historia di e ‘fundashon’ i e retonan ku nan mester a enfrentá atraves di añanan pa por a brinda un ‘kas’ i kuido na nivel na e grandinan. El a rindi onor na Sra. Astrid Gregorius, Sra. Corry Veeris, i sr. Daphne Kibbelaar. “Nan tabatin un soño ku awe, despues di diessun aña i hopi lucha nos a mira bira realidat.
Sra. Eustatius a informá ku den un prinsipio nan tabata brinda alberga na e grandinan na Grote Berg na Kas di Ansianonan Uní. “Situashon a pone ku nos mester a buska otro lugá i Birgen de Rosario a brinda nos esei den nan kapèl.” Sra. Eustatius mas aleu a konta di e vishon di Sra. Astrid Eustatius, Sra. Corry Veeris kendenan a kere hopi den empoderashon di tur hende ku tabata ligá ku e fundashon. “Esei a pone ku nos trahadónan, no opstante retonan fuerte, manera rekurso limitá i distansianan largu a sigui duna kuido e ‘grandinan’ ku hopi amor i dedikashon. “
Mas aleu el a konta ku e organisashon un tempu a operá na Nos Lantero i mas despues na Silberie na Banda Abou. El a gradisí muy en espesial Sr. Joey Pinedo pa e yudansa ku el a brinda pa drecha e edifisio ei pa por a hasié un kas di kuido. Sra Astrid i Corry a sigui buska yudansa serka otro persona i instansianan pa por a konstruí e kas nobo pa kuido di grandi.
E direktiva a pidi yudansa serka Gibi Bacilio, pa pensa un nòmber pa e ‘kas’, kende na su turno a pidi asistensia di artistanan Laura Quast, Rudolph Críspulo, Albert Schoobaar i Humphrey Monte. For di un kantidat grandi di nòmber a yega na e nòmber aktual; ‘Grandi na Kuido’. Minister Koeiman, sra. Gregorio i sra. Larmonie-Cicilia a develá un bòrchi ku e nòmber.
Finalmente Miniser Koeiman, huntu ku sra. Maria Kwidama, e abitante di mas edat di e kas di kuido a kòrta sinta pa asina realisá e akto simbóliko di apertura di e kas di Kuido na Tera Kòra; ‘Grandi na Kuido’.
Finalmente reverendo Curtis Mertis, di parokia di Tera Kòra a dirigí palabranan spiritual na esnan presente i a realisá akto di boutiso di e ‘kas’.

Advertisements
error: Content is protected !!
%d bloggers like this: