Advertisements

PIN ta pro mas forsa di kompra Subsidio pa hür di kas i asistensia finansiero pa yu

PIN ta pro mas forsa di kompra Subsidio pa hür di kas i asistensia finansiero pa yu

Willemstad — E aña aki suèldu mínimo a subi. Sinembargo ta parse ku esei solamente ta fortifikando un malestar ekonómiko ku hustamente ta afektá esnan mas debil ekonómikamente. P’esei Partido PIN ke pone aksènt kaminda e mester ta. Na lugá di diskutí solamente suèldu mínimo, mester papia tambe di redusí gastunan básiko di netamente e famia den pèrtá. Asina ta regla mas forsa di kompra pa esun ku mester di dje sin destruí Kòrsou su posishon kompetitivo regional, lokual lo trese mas pèrdida di trabou.
P’esei Partido PIN ta urgi gobièrnu pa intensiva e diálogo tripartit i alabes kuminsá ehekutá e palabrashonnan den e akuerdo di gobernashon dirigí riba fortifikashon di e forsa di kompra dje famia ku entrada mínimo.

Meta
Kada famia mes mester tin sufisiente rekurso pa atendé su nesesidatnan spesífiko. P’esei Partido PIN por komprondé e posishon dje sindikatonan uní pa hisa salario mínimo. Pero tantu bal mas salario mínimo si komo resultado di e subida mas kompania dal nan porta sera òf skrap kualke plan di invershon manera a sosodé e aña aki. P’e motibu aki, banda di adaptashon di salario mínimo, PIN ta opta pa fortifiká famianan primeramente ku redukshon direkto di su gastunan prinsipal.

Palabrashon
Un dje gastunan prinsipal di kualke famia ta e gastu di bibienda. P’esei den e akuerdo di gobernashon, riba insistensia di PIN, a palabrá ku gobièrnu lo tuma e pasonan pa hasi posibel ku e famia den un kas di hür ku no ta di FKP, tambe por risibí subsidio di hür. Un fasilidat sosial asina lo redusí su gastu mensual drástikamente. E sistema di subsidio ei lo yuda paga pa su mes paso entrada for di hür di kas ku awo ainda ta keda skondi pa servisio di impuesto, lo sali na kla.
Un di dos akshon dirigí riba famianan mas vulnerabe ku yu, ta kreashon paso a paso di un sistema di sosten finansiero ku ta kuadra mas ku e gastunan real di kuido (‘kinderbijslag’).
E dos akshonan aki ta krea mas forsa di kompra dirigí riba esun ku mas mester, sin destruí Kòrsou su posishon kompetitivo den region. Awor ta na gobièrnu pa rápidamente start e trayekto di konsulta i realisashon den fase di e puntonan aki.

Kiko awor
Partido PIN en todo kaso ta kere ku mester atendé di forma inovativo ku retonan pa nos pais. Sin ke kita e derecho tradishonal pa protestá i wèlga, Partido PIN ta hasi un yamada pa tur gremio — gobièrnu, sindikalismo i komersio — keda habrí pa inisiativanan inovativo pa apoyá direktamente e famianan ku mas mester di nos sosten.
Kenneth R.E. Martis, kandidato #7 Partido PIN

Advertisements
error: Content is protected !!
%d bloggers like this: