Advertisements

Resultado Kompetensia Garbage is the New Music KOMPETENSIA GARBAGE IS THE NEW MUSIC A SURPASÁ ESPEKTATIVA

Resultado Kompetensia Garbage is the New Music

KOMPETENSIA GARBAGE IS THE NEW MUSIC A SURPASÁ ESPEKTATIVA

Djasabra 2 di dezèmber Exhibition Hall na WTC tabata esenario pa e
kompetensia Garbage is the New Music ku partisipashon di 14 skol
sekundario. Maria College VSBO a resultá ganadó apsoluto di e kompetensia
sigui pa St. Ignatius VSBO komo promé finalista i St. Paulus AGO komo di
dos finalista. St. Ignatius VSBO a bai tambe ku e premio di skol mas popular.
E kompetensia a wòrdu organisá pa Selikor NV i ko-patrosiná pa Maduro &
Curiel’s Bank. Punto di salida di e kompetensia tabata forma un banda ku
mester produsí muzik for di instrumèntnan trahá di material reusá.
Selikor NV ta e kompania responsabel pa kolektá, transportá i prosesá e
shushi ku nos pais ta produsí, pero tin tambe diferente programa pa
konsientisá, eduká i formá nos komunidat riba importansia di un isla limpi.
Meta di e programanan akí ta pa realisá un kambio di aktitut den e forma ku
nos ta atendé ku shushi dor di stimulá mas sentido patriótiko i amor pa pais.
E grupo di enfoke prinsipal di e programanan di konsientisashon ta nos
hubentut i ta netamente den e kuadro akí mester mira e kompetensia
Garbage is the New Music.
Durante 4 luna largu alumnonan, ku mester a bai representá nan skol den e
kompetensia, a risibí guia di nan propio dosentenan i tambe di otro
profeshonalnan den arte di resiklahe i músika komo parti di nan preparashon
pa e kompetensia. Resultado di esaki tabata ku, dia di e kompetensia,
públiko presente por a disfrutá di kreashon di instrumèntnan úniko for di
material reusá i produkshonnan musikal na un nivel haltu.
Nos por bisa ku Selikor NV a logra e meta ku e kompania tabatin ku e
proyekto aki, esta pa nos hubentut kuminsá mira shushi ku otro bista i
realisá kiko tur nos por hasi ku un material ora ku no tin uzo mas p’e. Un
pabien ta bai na tur e alumnonan ku a kompetí pa nan skol. Un danki tambe
sigur na e diferente dosentenan ku a sa di guia nan alumnonan pa esakinan
por a trese un produkshon musikal na nivel dilanti.

Advertisements
error: Content is protected !!
%d bloggers like this: