Advertisements

Dia di Enseñansa: Kultura ta forma e base di edukashon i formashon

Dia di Enseñansa: Kultura ta forma e base di edukashon i formashon

Willemstad- Dia 1 di desèmber próksimo ta selebrá pa e di 35 aña di Dia di Enseñansa. E selebrashon aki tin komo enfoke primario, reflehá, balorá i mehorá kalidat di enseñansa. Segun e Akuerdo di Gobernashon, edukashon i formashon ta e vehíkulonan fundamental pa desaroyo di nos suidadaonan.
Den kuadro di esaki aki Ministerio di Enseñansa, Siensia, Kultura i Deporte (ESKD) ta selebrá e di 4 lustro aki di un forma speshal den sentro di suidat.

Tema di e selebrashon aki ta: “Willemstad, 20 aña riba lista di Patrimonio Mundial di UNESCO”. Esaki ta un bunita momento pa duna atenshon na nos kultura, desaroyo di kultura i aksentuá patrimonio kultural den sektor di enseñansa. Tambe ta den e mundu di formashon di hóben i adulto.
Kultura ta un aspekto importante den desaroyo integral di nos tur. Kultura ta enrikesementu spiritual i ta kontribuí na un desaroyo di kreatividat i na desaroyo personal di un komunidat. Tambe e ta duna un dimenshon na formashon di nos nashon.
Solamente ku konosementu di nos kultura nos por hasi eskohonan konsiente ku ta hasi nos fuerte pa asina realisá un nashon ku nos ta desea. Kultura i enseñansa ta basenan esensial den nos komunidat. Laga nos uni e dos kadenanan aki #huntu.

Minister di Enseñansa, Siensia, Kultura i Deporte, sra. Minister M. Alcalá-Wallé ta gradisí kada persona i organisashon ku ta kontribuí di un of otro manera na enseñansa, pa nan esfuerso, empeño i aporte.

Felis dia di enseñansa.

Advertisements
error: Content is protected !!
%d bloggers like this: