Advertisements

Buelo inougural no pa keiru na Haiti!

Buelo inougural no pa keiru na Haiti!

Djamars 28 pa djaweps 30 di novèmber, minister Steven Martina i su kolaborador señora Janice Welhous a fasilitá pa diferente medio di prensa na Kòrsou por a presensiá inougurashon di buelonan entre Haiti i Kòrsou. Komo tal por a nota presensia di representantenan di Tele-Curacao, Direct, Televishon Nos Pais, korantnan Extra, Ultimo Noticia, NOBO, La Prensa, radio Hoyer, personahenan aktivo riba facebook manera señor A. Hermelijn di e website Curacao Chronical i señor Orlando Molina di e website KIKO TA PASANDO, kendenan tur klaramente a demostrá interes pa partisipá na e evento aki. Pa loke ta trata representantenan di komersio i industria por a tuma nota di presensia di CATS, CINEX, C-Post international N.V., Selikor N.V., Antillean Soap Co/ Alablanca Food Products N.V., Curacao Laboratories L.T.D, Curacao Ecocity Projects, Profound Projects B.V., Curoil N.V, Fundashon Kas di Kultura Kòrsou. Tambe a forma parti di e delegashon parlamentarionan Rennox Calmes, Jaime Cordoba i Marilyn Moses. Den e libreto, konsistiendo di 23 página ku Departamento Ekonómiko (M.E.O) a produsí i ku a keda publiká ta splika eksplísitamente ku aki ta trata di un mishon komersial entre Kòrsou i Haiti. Pues, mester saka e konklushon ku e buelo aki sin duda ta pa promové e konekshon komersial entre Repúblika di Haiti i Kòrsou. No tin duda ku Haiti enbèrdat ta un pais pober, pero ku ta habitá pa 11.000.000 suidadano. Naturalmente ta asina ‘ki ku no ta tur hende na Haiti ta hende pober. Mirá puramente for di e punto di bista di Kòrsou, e benefisionan di introdukshon di un buelo aéreo, manera awor a tuma lugá pa Sunrise Airways, ta pa fasilitá e kontaktonan entre famianan di Haiti i Kòrsou, habri e posibilidat di biahenan entre e dos islanan i prinsipalmente pa rebibá Freezone ku ántes tabatin prinsipalmente haitianonan komo kliente. Tòg ta asina ku na momento ku kualke periodista dal su promé stap riba suela di Haiti e ta sinti i of eksperensiá mesora e konsekuensianan doloroso kousá pa korupshon, estafamentu di kaha di gobièrnu, inhustisia sosial i desigualdat, kombiná ku gueranan polítiko tenas bringá te den tòm ku al final a perhudiká e pueblo haitiano ainda mas. Haiti ta e isla mas pober den Karibe. Un bishita kòrtiku manera esun ku a tuma lugá na Haiti pa e delegashon di Kòrsou, ounke no tabata e intenshon, ta sirbi komo atvertensia pa nos tur na Kòrsou pèrkurá pa nos isla hamas i nunka kohe e rumbo manera Haiti. Gran mayoria di esnan ku a forma parti di e delegashon ku tabata na Haiti a saka siñansa ku nos mester kuida nos Kòrsou.
Pa loke ta periodismo na Kòrsou, mester saka e konklushon ku e ruta di bati otro na radio, den talkshows i den korant pa tacha otro su imágen al final ta krea un esfera sumamente negativo i destruktivo, ku ta intragabel pa sirkunstansia di bida sano si Kòrsou ke progresá bèrdat. Den e esfuersonan pa promové Kòrsou den Karibe i sobrá di mundu ta rekomendabel envolví periodistanan mas tantu posibel. E mentalidat ku e yu di Kòrsou mester ta kontra di tur loke ta na su fabor no mester gana e bataya. Nos mester ban uza nos talento i konosementu pa kontribuí na adelanto di nos isla. Remarkabel ta ku hopi hende na Kòrsou no por biba sin wak estriktamente nan interes personal, ounke parti di e interes ei ta tambe un pais ku ménos pobresa, krímen, mizeria i un medioambiente responsabel ku konosementu debido di nos kultura i identidat. Ke men mester traha riba eseinan tambe. Mi ta spera ku e biahe pa Haiti tabata un lès pa tur ku a presensi’é, pero ku e lo sirbi alabes komo motivashon pa nos traha dediká na adelanto di Kòrsou.

Advertisements
error: Content is protected !!
%d bloggers like this: