MFK un biaha mas ta falta ku étika parlamentario i trose bèrdat

MFK un biaha mas ta falta ku étika parlamentario i trose bèrdat

Den e reunion públiko tokante Guandong Zhenrong nos por a tuma nota ku e lider polítiko di MFK Sr. Schotte a trese informashon inkorekto i tendensioso di MDPT dilanti pa trata na mancha imágen di Sr. Edward Jesus, esposo di minister Sra. Zita Jesus Leito.

Korekto ta ku Sr. Jesus ta un ingeniero ku mas di 34 aña di eksperensia den e sektor petrolero.
Despues ku el a baha ku penshun, MDPT a traves di Sr. Wiels, a aserk’é pa duna konseho na MDPT. Asina el a firma un kontrato via su kompania di konsultent pa 20 ora pa siman ku MDPT. Sr. Jesus komo konsultent a keda enkargá ku un tarea spesífiko i tékniko den kua e ta spesialisá. E spesialidat ei no tin nada di haber ku e ta esposo di Sra. Jesus Leito. E spesialidat ta lokual el a studia p’e i a gana 34 aña di eksperensia trahando. Ku otro palabra, e punto ku Sr. Jesus ta esposo di Sra. Jesus Leito no tin ningun balor agregá den e diskushon tokante Guangdong Zengrong.

Loke realmente ta pasa ta ku Sr. Schotte no kier hasi nada otro ku brua komunidat i trata a base di ponensia i preguntanan tendensioso na mancha nòmber di hende i kaba ku nos profeshonalnan. Algu ku e tin basta tempu ta hasi kaba. Ta algu kustumbrá di MFK pa krea duda i divishon den nos pueblo. Banda di e esaki tin e praktika tambe di difamá hende i konsientemente trata na duna tur hende e mes imágen ku Sr. Schotte mes tin. Un práktika unda kada bes atrobe ta mancha hende pa asina hasi tur hende igual na dje. Antop hopi biaha ta hasi esaki den sala di parlamento unda e hende ku e ta mancha no tei of no por hana palabra pa defende su mes. E biaha aki tabata burt di Sr. Jesus.

E tendensia di Sr. Schotte di trese tur hende abou na su nivel ya kaba for di 2010 a hasi hopi daño i a stroba i perhudiká profeshonalnan lokal íntegro ku hopi kapasidat di sigui ehersé nan labor na fabor di nos pais, ku tantu nos mester.

Pa mustra e kontraste, tur hende sa ku PAR no ta kompartí e pensamentunan di Sr. Schotte ni su forma di proseder. Sin embargo semper PAR a atendé ku e tópikonan, a krítika Sr. Schotte pa su aktonan ku na nos opinion ta kontra di interes di Kòrsou. Sin embargo nunka PAR no a hala su señora esposa den e diskushon pa proba su aktonan di mala fe. Esaki ta simplemente pa rèspèt pa pueblo . Pesei tambe PAR ta konsiderá proseder di Sr. Schotte den e kaso aki inkorekto i baho.

Pues pa konkluí tres punto:
Na promé lugá ta MDPT a aserka Sr. Jesus independientemente di gobièrnu i su Sra . Minister Jesus Leito pa e duna su aporte basa su konosementu i eksperensia. Na di dos lugá mester stòp di trata na hasi daño na nos profeshonalnan i baha nan balor. Na di tres lugá, ta falta di étika total pa di un manera manipulativo trata na hasi daño na un polítiko a traves di hasi daño inhustu na su famia.

Ehèmpelnan kontrali ta di sobra i ta rekomendá Sr. Schotte pa e no tira piedra riba kas di otro ora esun di dje ta di glas.

Leave a Reply

%d bloggers like this: