Kobransa di impuesto na penshonadonan biba den eksterior ; kuantu esei lo bai generá ?.

Kobransa di impuesto na penshonadonan biba den eksterior ; kuantu esei lo bai generá ?.

Lei di penshun di behes (AOV) su meta ta pa nos komo komunidat yuda hende grandi biba den nos pais ku un sosten finansiero ora nan yega sierto edat. Ta dunadónan di trabou i trahadónan den nos pais ta paga un prima ku ta bai den un fondo pa nos paga nos penshonadonan. E lei ta papia semper di siudadano pues hende ku ta biba den e pais. E lei su meta prinsipal ta pa yuda nos hende grandinan biba den nos pais. Na momentu ku kos bira difísil nos mester garantisá primeramente ku por sigui paga penshonadonan ku ta biba den nos pais. Derecho riba e penshun no ta mara ku si b’a paga prima òf no. Ora bo tabata traha ba kontribuí den e fondo pa otro kobra. Na e momentonan aki ta e trahadó I e dunadó di trabou na Kòrsou ta kontribuí den e fondo pa penshonadonan por kobra. Pues e echo ku den pasado un hende a aportá den e fondo no nesesariamente ta dun’e derecho pa kobra na e momentonan aki. E situashon finansiero ku nos pais ta pasa aden ta obligá gobièrnu pa tuma diferente akshon pa garantisá un biaha mas ku por paga esnan ku ta biba aki ku ta aportá na nos ekonomia. Segun informashonnan ku frakshon di partido MAN a optené t’asina ku entrante 1 di yanüari 2018 lo tin kambio den lei di impuesto. Esaki ta enserá ku penshonadonan ku no ta biba riba nos isla pero ku ta kobra penshun di behes konosí komo AOV via SVB – Kòrsou lo bai kuminsá paga 9.75 % di impuesto riba nan penshun. Esaki no ta konta pa penshun di behes (AOV) so pero tambe pa esnan ku ta kobra penshun di buida, buido i wèrfano, konosí komo AWW. Pues SVB lo bai retené 9.75 % di nan penshun i entrega esaki na departamento di impuesto. Si ta bon tur penshonado biba den eksterior a haña un karta kaba notifikando nan ku esaki lo bai sosodé. Lei di impuesto a kambia for di 2015. Den e lei nobo e asina yama “ Basiskorting voor Buitenlandse Belastingplichtige” a kai afó. Si bo ta biba den eksterior pues bo no ta siudadano di nos pais i bo ta haña un entrada via di Kòrsou bo tin ku paga impuesto. Departamento di Impuesto no a kobra na 2015, 2016 ni 2017 pero debí na e situashon finansiero di nos pais lo kuminsá kobra sigur na 2018.

Den kuadro di esaki parlamentario pa frakshon di MAN sr Wimbert Hato a hasi e siguiente preguntanan na Minister di Finansas sr. Keneth Gijsbertha:

• Minister por informá nos kuantu penshonado e akshon aki lo afektá ? kuantu na Hulanda, Bonaire, otro islanan I restu di mundu
• Minister por informá nos kuantu e kobransa aki lo generá pa kaha di gobièrnu.
• Minister por informá ku si tin un kompensashon pa suavisá e posibel malestar ku e medida aki ta kousa pe penshonadonan enkuestion. Por ehèmpel rebaho di impuesto den e pais ku nan ta biba ?

Wimbert Hato
Parlamentario pa frakshon di MAN den Parlamento

2 thoughts on “Kobransa di impuesto na penshonadonan biba den eksterior ; kuantu esei lo bai generá ?.

  1. Pa kuminsa, Nos a paga e bendito inkomsten belasting KABA ora nos tbt traha na Antias ( Korsow) den e kaso aki… Boso ta HOPI PLEGA pa BOLBE kobra loke ta RESTA NOS den NOS dianan BIEUW… I aki na “Hulanda ” tmb e ta 1 entrada, pwues : “Ora mi a tra tin belasting, awor mi tin di kobra mi pension tin OTRO belasting anto 2 bia…” !!! 1 na Korsow i otro na Hulanda pa 1 entrada ….. Un ta miho BOSO hinke den BOSO “SANKA ” ???? Ta 1 biaha NOS ta biba riba e mundu aki ku NO KONOSE FRONTERA… ( NINGUN ASTRONUATA ku a bai ESPASIO NO a mira esaki ) !!! Hopi KRUEL mes pero BOSO ta DIOS di e mundo aki, pwues dal bai…

    Boz di BURIKU NO TA JEGA SHELU ….

  2. Ami ta floho na kere e kos aki. Mi a paga belasting durante e añanan ku mi a traha na Kòrsou. Awor Gobièrnu ta pluk nos kaal. Mi a paga pa mi por kobra mi penshun awor ku mi a alkansá e edat aki. Awor Gobièrnu ta trastornando mi manera ta limosna mi ta pidi, anto bolbe kita for di dje.
    Kiko lo bai sobra ora kita kasi 10% afó??
    Pa ora e yega aki tambe nan kita afó??
    Nos no por yuda ku gobièrnunan anterior semper a hiba mal maneho ku plaka di pueblo. Ta un abuso di marka mayor.
    Nos tin di biba onder de armoedegrens pa fayonan di gobièrnunan di Kòrsou.
    Ku otro palabra nos mester sera buraku ku boso a koba.
    Kon ta pará ku demokrasia. Ami no a skohe pa esaki. Pueblo a vota pa esaki?
    Ladronisia na gran eskala. Witteboordscriminaliteit.

Leave a Reply

%d bloggers like this: