Kantamentu den un Kor: Ki benefisio esaki tin?

Kantamentu den un Kor: Ki benefisio esaki tin?

WILLEMSTAD – E palabra Kor, originalmente ta nòmber di un espasio importantísimo den un misa o katedral. E ta e espasio kaminda e altar ta posishoná den un misa o katedral i ku pastornan i monganan tabata kanta na tur dos banda di dje. Ta di aki e konekshon a ser hasí entre di e espasio den un edifisio (misa) i kantamentu den grupo. Histórikamente mirá, kanto koral na Europa tabata mará na misa i liturgia. For di e punto di salida aki nos por definí un koro komo un grupo di hende ku ta kanta huntu kreando un kurason komun kaminda e relashon entre “humanidat komo un totalidat” i mundu / kòsmos ta bini na ekspreshon. Pues na momentu ku un kor ta kanta, kada korista no ta bezig ku su propio kurason per ta dirigí su mes tambe riba su ko-korista i e músika. Pa logra esaki mester tin un bon konekshon entre di e oido i e kurason. Mester tin espasio pa skucha otro i hasiendo asina pa krea e kalor i pashon ku por ser interpretá komo e kurason komun.
Tin diferente tipo di Kor saliendo for di Kor di mucha, kor di hóben i Kor di adulto. Esakinan por tambe diferensia pa sekso dus kornan di hende muhé so, o Kornan di hende hòmber so. Tambe nos konosé koronan miksto ku ta konsistí di tantu hende hòmber komo hende muhé. Den un koro kada stèm tin un nòmber. E nòmber pa e stèmnan mas konosí serka hende hòmber den e sekuensia di alkanse di tononan mas abou pa tono mas haltu ta: bas – báritòn – tenor i serka hende muhé : alto – mezzo soprano – soprano. E diferensia aki ta fasilitá ku kornan por kanta mas bos, harmonisando e kanto den 2, 3, 4 o mas bos.
Rònt mundu i na Kòrsou tambe hopi músiko, kantante i sigur kantantenan grandi a kuminsá ku nan karera musikal den Kor. Dikon? Pasobra kantando den un koro ta siña e téknika di kanto, desaroyo di e oido, respirashon korekto i tambe pa hasi músika huntu. Aki e parti estétiko di músika ta bini hopi dilanti i hende ta siña apresiá bunitesa i tambe e grandesa i poder di músika komo vehíkulo di komunikashon i arte kompartí. Durante di e sekshonnan di training den kor ta siña konsentrá i kanta independiente i interdependiente. Alabes hopi biaha un kor ta un aktividat sosial pa e koristanan. Bo ta duda ainda? No duda mas, buska un koro i kuminsá apliká e arte di kanto.
Durante di e siman aki tur dia Fundashon Koronan Uní lo sigui trese informashon na pueblo di Kòrsou riba importansia di kantamentu pa un pueblo. E informashonnan lo ta riba e medio sosial facebook di Fundashon Koronan Uni tambe. Esnan ku ke reakshoná por reakshoná via di facebook o por drenta den kontakto ku e presidente di Fundashon Koronan Uní, sr. Gilbert Gruning na telefon 510-6808 o manda un email na kornanuni@gmail.com

Leave a Reply

%d bloggers like this: