DIA INTERNASHONAL DI DIABÉTIS

DIA INTERNASHONAL DI DIABÉTIS
Willemstad – Dia 14 di novèmber ta Dia Mundial di Diabétis. E tema di e aña aki ta “Muhé i diabétis- nos derechi pa un futuro salú.” Manera nos sa, diabétis 2 ta e tipo di diabétis ku mas nos ta mira den nos komunidat. Diabétis ta subi e riesgo pa malesa di kurason, e sistema vaskular, pèrdida di bista, pèrdida di pia i hasta dialises. Nos ta mira ku serka hende muhé e riesgo ta mas grandi pa haña e malesa diabétis. P’esei tambe ta duna mas atenshon na salú di hende muhé. Mas e hende muhé kuida pa evitá e malesa aki, mas grandi e efekto riba salú lo ta. Paso su famia tambe lo bira konsiente ku nan mester kuida nan salú.
Segun un rapòrt di Volksgezondheid Instituut Curaçao (VIC), kasi un (1) riba kada dies (10) hende den nos komunidat tin diabétis. Esaki ta nifiká ku kasi 10.813 persona ta sufri di e malesa aki. Nos ta konstatá ku na aña 2011 tabatin 7.9% i na 2016 el a bira 9,3 % di nos poblashon ku diabétis. Minister Camelia -Römer ta mustra ku tur hende mester bira mas konsiente di kon biba salú pa tin un kalidat di bida relativamente haltu. Esaki ta posibel si e pashènt di diabétis ta kuida dor di tene su mes na su remedinan i e dieta preskribí pe, kombiná ku moveshon pa stimulá e sirkulashon di sanger. Minister a indiká tambe ku e meta i reto mas grandi ta pa kambia nos manera di biba ku malesa pa esun di un bida salú. Den kuadro di e vishon di “wellness” ta pone énfasis riba mantenshon di un bida salú i ta urgí tur hende pa kuida nan kurpa mas tantu.
Lo tin un aktividat djamars atardi na plasa Brion entre 5 or pa 6 or. Lo saka potrèt i esaki lo keda manda internashonalmente. Bin forma parti na e grupo pa forma e lèternan “WDD” (World Diabetes Day). Bin na tempu pa bo haña bo t- shirt pa por partisipá!
Minister Camelia -Römer ta deseá tur hende un dia di reflekshon riba nan salu, ku deseo pa ban kuida nos mes i nos hendenan mas mihó kontra malesa di diabétis.

Leave a Reply

%d bloggers like this: