MFK ta presentá proyekto di lei adaptá pa permití glas skur te ku 40% riba glasnan dilanti den banda di un vehíkulo

MFK ta presentá proyekto di lei adaptá pa permití glas skur te ku 40% riba glasnan dilanti den banda di un vehíkulo

Esaki primordialmente pa protehá nos komunidat di rayonan solar dañino i redusí temperatura (kalor insoportabel) den nos vehikulonan

Mas i mas debí na penetrashon di rayonan solar, dor di destrukshon di nos kapa di ozòn protektor i a konsekuensia kambio di klima, nos ta eksperensiando temperaturanan mas haltu ku normal. Esaki ta trese kuné ku doñonan di vehíkulo mester hasi muchu mas esfuerso pa nan por mantené nan vehíkulo i asina por hasi uso di esaki den forma optimal.

E kambio ariba menshoná ta kontribuí na;

– Yuda pa konserva redukshon di kolo di e interior di e vehíkulo
– Ta blòkia rayonan Ultra Violet di solo
– Ta mantené gran parti di e kalor for di e parti paden di e vehíkulo
– E tint ta protehé e glas pa no kibra na pida pida i kai den e vehíkulo
– Ta kontribuí parsialmente na privasidat i seguridat

Na Kòrsou un vehíkulo no ta un luho, loke ta hasi ku mantenshon di vehíkulo ta alargá bida di e vehíkulo. Un di e aspektonan ku usuarionan di vehíkulo a bin ta mustra riba dje ta, ku ta difísil pa mantené e interior di un vehíkulo. E rayonan di solo den e klima kayente ku nos tin na Kòrsou durante di hinter aña, ta hasi ku ta praktikamente imposibel pa konservá e interior (sea kueru òf venil) di un vehíkulo. Nos mester remarká tambe ku esnan ku ta pasa hinter dia den nan vehíkulo pa trabou ta eksponé mas tantu na rayonan solar.

Basá riba petishon ku frakshon di Movementu Futuro Kòrsou (MFK) a risibí durante di su enkuentronan ku pueblo i tambe konseho di Raad van Advies, frakshon di MFK a disidí pa analisá e lei di “Wegenverkeersverordening 2000” i tambe un kambio riba e lei aki, entregá na komienso di 2016.

E motibu primordial ku a introdusí prohibishon pa glasnan skur na e glasnan dilanti na banda di e vehíkulonan tabata basá riba e aspekto pa frena kriminalidat. Lamentablemente no tin ningun informashon i/òf registrashon ku den praktiká e kambio di lei aki a kontribuí na minimalisá kriminalidat. Al kontrario nos por tuma nota ku durante último añanan kriminalidat a subi barbaramente.

Frakshon di MFK ta kere ku apesar di tur esaki no mester pèrdè e aspekto di kriminalidat for di bista, pero nos mester brinda doñonan di vehikulonan e oportunidat di por kuida nan salu i tambe interior di nan vehíkulo. Esaki pa nos di MFK ta motibunan sufisiente pa presentá un proyekto di kambio di lei kaminda ta permití pa pone “tint” riba glasnan dilanti den banda te na un máksimo di 40% di visibilidat den e vehíkulo (mira e tabla ku ta bai huntu ku e komunikado aki), pa asina kontribuí na protekshon di e salú di e usuario i tambe e interior di e vehíkulo.
Di e forma aki frakshon di MFK ta spera di a duna un kontribushon na tur outomobilista, i ku e lei aki yega Parlamento mas pronto posibel pa tratamentu i ku Gobièrnu di Kòrsou na su turno publiká esaki inmediatamente.

Frakshon di MFK ta spera ku sano huisio lo prevalesa den kaso aki na bienestar di nos Pueblo.

Kòrsou, 12 di òktober 2017

Na nòmber di frakshon di MFK,

Gerrit F. Schotte
LV WVCC 2000 Curacao

Leave a Reply

%d bloggers like this: