Advertisements

WALK and DANCE WITH THE ZOO 2017

WALK and DANCE WITH THE ZOO 2017

Un inisiativa di Curaçao Zoo pa yega na fondo pa drecha nos Zoológiko nashonal riba nan propio forsa, e retraso gubernamental ta laga hopi di deseá !
Gerente general di Curaçao Zoo, Hubèrt ( Bert) Isenia a habri e rueda di prensa huntu ku MC Monti Girigoria i srta. Taniushka Rosinda, ku un splikashon di tur e estorbonan ku nan a bin ta konfrontá e último añanan.
Despues di 6 aña bo ta mira un retraso den nos desaroyo debí na e sistema gubernamental ku Kòrsou tabatin e último añanan. Na momento ku bo logra yega na un abertura ku e ministerio i e aparato e gobièrnu a kai òf ta den kualke dilema ku ta pone ku nos zoológiko nashonal no ta risibí e atenshon nesesario.
Aktualmente nos tin 430 animal den nos parke i diferente animal ku a wòrdu konfiská durante e último 6 aña ku ta eksigí kuido i atenshon special, esaki ta pone un peso finansiero haltu ku ta hasi nos situashon aun mas prekario, tur luna ta un lucha pa keda mantené nan kalidat di bida haltu, i abo tin ku inventá den ki forma bo ta logra yega e siguiente luna. No opstante tur e limitashonnan, nos ta kreativo i ta logra sobrebibí ku sosten di diferente organisashon i instansianan ku ta plaats nan klientenan serka nos, por ehèmpel fundashon kontakto, SGR groep, Ambulante Justitiele Jeugd Zorg, Blenchi School, Kolegio SKAIH i diferente otro skol i organisashon. Sosten familiar den diferente forma i personanan o instansia ku ta sostené nos via standing order ku un donashon chikí.
Unda nos ke bai, nos ke atenshon serio di gobièrnu, nos ke stabilidat, pa Kòrsou ta konsiente di e parke i su balor, pa nos tur balorá e eksistensia, si nos no komprondé ku e parke tin derechi di eksistensia dan houdt het op! Pa gobièrnu i tur habitante realisá esaki i sostené.
Nos ke yega na un parke riba nivel internashonal ku ta kompetí ku kualke un gigante internashonal òf asta mihó, basa riba e echo ku nos tin un klima ku ta permití hopi, nos tin espasio pa garantisá di tin e infrastruktura mas moderno, hoy en dia pa loke ta trata un zoológiko moderno, partisipá den proyektonan internashonal di konservashon i reprodukshon di rasanan den peliger di ekstenshon, esaki ta trese kuné divisa i turismo ambiental, alabes e mihó área di rekreo familiar i ku tambe lo por sirbi komo área di terapia.
Kiko ta stroba nos?, Un trayekto pa por importá animalnan internashonal sin mester di retraso den e sistema lokal, un zoológiko ta mara na quarentena interno i tratado global ku no por tin retraso lokal aden ,animalnan eksótiko di tratado di un zoológiko ta protehá dor di e gremio di zoológiko internashonal. Leinan antikuá na Kòrsou, retraso den aparato gubernamental di años, petishonnan ku ta pèrdè misteriosamente, kòmplòt di bisiña ku plan pa será e parke paso ta stroba nan trankilidat, ku ta pretendé ku nan kas tin mas balor ku un área di rekreo nashonal, k upa un i tur su informashon, e parke ta tei promé ku a pensa di bin traha kas den e bario i ku ta lubidá ku derechi di eksistensia (bestaandsrecht) ta pisa ketu bai, bòikòt di organisashonnan den serkania ku no ta realisá ku e tereno ta un área di rekreo nashonal . Parke mester por kobra pa entrada, retraso den kontesta via di ministerio di GMN riba diferente punto agudo. Loke tambe ta stroba hopi ta vandalismo ta tuma lugá di e forma aktual ku bishitantenan ta maltratá bestia, ta kibra kos, diariamente nos tin ku enfrentá ladronnan ku ta kòrta waya di kura, ora hasi petishon pa pone omheining (hisa kura) segun standard internashonal tin ku tende ku esaki no ta posibel debí ku ta stroba bientu di pasa pa drenta kas di bisiña. Ku si pone un lus riba tereno di parke pa evitá ladron di bishita..esaki ta stroba bisiña di drumi anochi etc etc. Ta basta! Un área nos tras ku ta dam di kas kòrá ku den e último 100 aña no a risibí e limpiesa pa un dam segun standard, ku mester wòrdu koba i mantené anualmente òf, aló ménos kada 5 aña. Hoy en dia esaki tin un profundidat di ménos ku 2 meter, i banda di esaki a hòrta mas ku 16 hèktar hasi hòfi i kunuku, ku sosten di kompanianan di gobièrnu, esaki si por den e área di EOP. Petishon na DOMEIN BEHEER entrega for di febrüari sin oido pa e dolónan di Parke. Pero tristu pa mira ku rondó di e parke si hopi kos por òf ta wòrdu tolerá ta ponebo realisá ku sin padrino/madrina nada no ta posibel riba mi pida baranka.
Apesar di tur kos, nos ta kuminsá konta di nobo, esaki ta nos promé paso. Oustralia: Den e plan maestro nos lo desaroyá nos Tour around the world Petting Zoo, kiko esaki ta? Un kinderboerderij temátiko, kaminda nos bishitantenan i sigur nos muchanan lo sinti nan na tur kontinente den un rekorido den nos petting zoo. Pa kuminsá manera nos a bisa, ta start ku e parti mas patras ku ta Oustralia,lo bini Afrika, Sur Amérika, Norte Amérika, Asia, India un fantasia di Europa i sin laga afó e kunuku di Kòrsou ku lo ta e chèri riba e bolo, dikon no drecha loke ya tei? Debí ku esaki ta kosta mas i mester move e animalnan na un área safe pa por drecha nan hábitat aktual, mester prepará e supsuela, kabel,pipa di awa, desague, faiber i sobra.
Kon nos ta bai yega na e promé área aki: nos ta start huntu ku nos arkitektonan i e tékniko sivil pa e parti di afwatering, mantel buizen, verblijf segun standard di AZA (Association of Zoos and Aquarium) e sistema moderno di kria ta sin kouchi ku trali, nos ta papia di un hábitat un área ku ta imitá nan área natural di bida. Pa mas detaye subi nos website i pasa dor di e dokumento di mas ku 60 página ku ta nos Master plan, si boso ke sa mas informashon pasa anytime na kantor i nos lo splika boso ampliamente.
Kon nos ta bai yega na Oustralia: dor di realisá nos propio eventonan pa rekoudá fondo. I e promé evento di e team aki lo ta: Walk and Dance With the Zoo slogan….Unleash the Beast.
Monti Girigoria a konta di su banda manera Bert a bisa kaba nos próksimo evento ku nos ta bai organisá ta nos WALK and Dance With the Zoo Unleash the Beast. Dia 1 di òktober awor lo bai tin un kaminata kombiná ku baile. E idea ta ku kada un stòp ta simbolisá un pais for di kua un animal lo bai bini. Na kada stòp lo tin un instruktor di baile, ku pa mas o ménos 20 minüt lo duna un workshop di un baile di e pais konserní. Boso por pensa por ehèmpel riba un Brazil, i einan lobo siña baila kizomba. Nos posibel ruta lo ta, Saliendo for di parkeerplaats di Vigdis Jonghkeer School, pa 6’or di mainta subi Corrieweg, kaminda lo tin e promé stòp, aki nan lo bo haña Dj Ro1 ku e promé instruktor. E siguiente stòp lo bai ta na altura di Snack Center 45, kaminda e partisipantenan lo bai topa Dj Black, nos di 3 stòp lo bai ta na plenchi Brievengat huntu ku dj Atley. Nos delaster stòp lo bai ta na parkeerplaats di Skol Emmanuel, huntu ku dj Decky. Djei nan nos lo sali bai Festival Center kaminda nos kaminata lo kulminá en grandi, kaminda e partisipantenan lo wòrdu deleitá pa e banda VEGA i tambe grupo Limania.
Preis pa e kaminata aki lo bai ta 65 florin pa un package di 4 persona. I 20 florin pa un karchi individual. Punto nan di benta lo bai ta Beep beep i tambe 24 uur uit de muur i tambe aki mes na ofisina di Curaçao ZOO. Nos ke yama un danki hopi spesial na tur nos spònsernan.

Advertisements
%d bloggers like this: