Programa di Urgensia i Programa di Gobernashon entregá na Konseho di Minister

Programa di Urgensia i Programa di Gobernashon entregá na Konseho di Minister

WILLEMSTAD – Ayera merdia 30 di ougustus 2017 Konseho di Minister a risibí e Programa di Urgensia, ku tin komo título “Pa mehorá kalidat di bida den bario” i e Programa di Gobernashon “ Ontplooien van Curacao’s potentieel”. Ku satisfakshon e gabinete a risibí e dos programanan, ku den un tempu bastante kòrtiku a keda desaroyá huntu ku barionan i ku involvimentu di tur ministerio.

Manera ta konosí, gabinete Rhuggenaath, a palabrá pa denter di tres luna, banda di un Programa di Gobernashon, presentá un programa di urgensia pa kombatí pobresa riba nivel di bario. Den e kuadro akí durante luna di yuni i yuli último a hasi análisis a base di diferente rapòrt trahá den pasado tokante desaroyo den bario. Tambe tabatin seshonnan ku e ministerionan i kombersashon ku algún bario i ku diferente organisashon i personanan ku konosementu di strategianan pa kombatí pobresa na nivel di bario. Segun ekspertonan riba tereno di kombatimentu di pobresa rònt mundo, ta importante pa kombiná sierto aktividat ku otro i ehekutá esakinan huntu pa asina logra mehorá e kalidat di bida na nivel di bario.

Según e strategia aki, no ta midi pobresa solamente a base di entrada pero según un aserkamentu multidimenshonal. Den e aserkamentu aki ta mira pobresa komo un sirkulo visioso riba diferente dimenshon ku un persona no por kibra fasil pa e por sali for di su situashon di pobresa. E retonan ku e ta enfrentá tin di ber ku retraso den enseñansa i formashon, mal estado di bibienda, salú malu of ménos bon, poko tempu liber pa rekrea i hopi biaha falta di un trabou of ku un trabou mal pagá.

Pesei ta importante pa atendé tur e aspektonan aki pareu kambia situashon di pobresa pa famianan di un forma duradero. Mirando intensidat di un strategia asina, no ta konsehabel ni posibel pa kuminsá ku tur bario pareu. Intenshon ta pa desaroyá alabes un modelo ku poulatinamente por sigui usa den otro barionan i keda ehekutá a largo plaso paso pobresa no ta algu ku ta resolve den tempu kòrtiku.

Pa skohe e areanan den kual ta kuminsá traha, a usa diferente kriteria. Por ehèmpel, no a skohe bario kaminda mester hasi trabounan di infrastruktra grandi. E área mester tin sierto fasilidatnan eksistente manera un sentro di bario, un skol, fasilidatnan deportivo, misa ets. pa por hasi sierto aktividatnan i traha huntu. Pesei. E area mester tin tambe un skol pa VSBO/AGO mirando ku investigashon riba salubridat bou di hubentut, a mustra ku den e grupo aki tin hobennan ku ta mas vulnerabel. Tambe a skohe pa e barionan ta repartí riba Kòrsou. A skohe pa kuminsá traha riba nivel di bario den 4 area, esta Banda Bou, pero saliendo for di Barber; Buena Vista, Montaña i Otrabanda.

Ta bon pa enfatisá ku tin mas proyektonan ku e gobièrnu aki ta hasi den bario i riba nivel di bario i ku lo sigui hasi esei rònt Kòrsou. Por ehèmpel ta drecha infrastruktura den barionan manera Kortijn i Tera Kora, ta duna servisio den kasnan di bario, tin trayektonan riba tereno di salubridat i kombatimentu di kriminalidat riba nivel di pais. Tur e aktividatnan aki ta tuma lugá den kuadro di e programa di gobernashon ku a keda entregá tambe djarason na Konseho di Minister, ku awor e ministernan ta bai trata pa akordá esaki. Pa djabièrne awor lo duna mas informashon tokante e programa di gobernashon.

Riba e fotonan ta mira Konseho di Minister na entrega di e dos programanan.

%d bloggers like this: