Elsa Rozendal di MAN ke sa si lei di BION a trese alivio p’e hóben desempleá.

Elsa Rozendal di MAN ke sa si lei di BION a trese alivio p’e hóben desempleá.

Lei di BION a keda aprobá den parlamento na 1989 pero a keda drumi den lachi. Riba 1 di sèptèmber 2014 e lei a drenta na vigor.
E meta di Lei di BION ta netmanete pa stimulá ku nos hóbennan desempleá por subi merkado laboral. E tin ku stimulá doñonan di trabou pa tuma hóbennan entre 18 i 30 aña, ku tin mas ku 1 aña sin trabou, den servisio a kambio di insentivo fiskal. Esaki lo mester yuda baha desempleo hubenil aki na Kòrsou. Awe, 3 aña despues, segun Rozendal mester hasi un evaluashon pa sa efektividat di e lei aki.
Den e kuadro aki, Parlamentario Rozendal a manda karta pa minister di SOAW, señor Hensley Koeiman, pa sa entre otro, si a laga hasi un evaluashon di efektividat di e lei. Tambe e Parlamentario a puntra kuantu hóben a logra haña trabou pa medio di e lei aki, kuantu di nan ta trahando te ainda, kuantu e lei a kosta Gobièrnu i si doñonan di trabou ta satisfecho ku e lei. Mas aleu e Parlamentario a puntra e minister den su karta kiko Minister ta bai hasi ku e lei si resultá ku e no a sirbi su meta.
Mirando ku desempleo bou di hóbennan ta keda alarmante (segun CBS, 2016 tabata tin un porsentahe di 36.7% di desempleo bou di hóbennan), ta imperativo ku mester hasi algu mas ku solamente bini ku un lei di BION. E Parlamentario a puntra tambe kiko e minister su plannan spesífiko ta pa kombatí desempleo bou di hóbennan.

%d bloggers like this: