Preokupashon pa e situashon di riolering den Otrabanda en espesial ku binimentu di Hospital nobo i Awa di fekalia den e binnenwater na Otrabanda

Tópiko: Preokupashon pa e situashon di riolering den Otrabanda en espesial ku binimentu di Hospital nobo i Awa di fekalia den e binnenwater na Otrabanda

Apresiabel sra. Minister,

Preokupashon pa e situashon di riolering den Otrabanda en espesial ku binimentu di Hospital nobo. Awa di fekalia den e binnenwater na Otrabanda. E situashon di riolering den Otrabanda ta di hopi preokupashon pa basta tempu kaba. E Sistema di kloaka di e area di Otrabanda ta konektá riba un “ pomphuis” ku tin ku sòru pa e awa di riolering di Otrabanda yega Klein Hofje. Pa un òf otro motibu e sistema pa algun tempu no ta trahando bon ku konsekuensia ku parti di e awa sushi aki ta haña su kaminda pa e binnenwater ku tin pariba di Hotèl Holliday Beach nèt dilanti di El Tributo. Ora bo kana den e area ta un holó masha desagradabel bo ta haña bo konfrontá kuné. Nos a komprondé ku den pasado tabatin diferente plannan pa koregí e situashon aki pero pa un òf otro motibu nan no a ser realisá. Nos a komprondé ku na momentu ku hospital nobo ta kla lo e ser konektá riba e sistema di riolering ku tin aworakí I nos tur por imaginá ki problema grandi esei lo okashoná den e area ei pero tambe pe kasnan den Otrabanda. Nos ta papia tokante di desaroyá e area komo un zona turístiko pero kon por hasi esaki si e e awa sushi di nos riolering ta haña su kaminda ei den.Turistanan ku ta kana di e hotèl bai sentro di siudat tin ku pasa tur dia den e area ei.

P’esei nos di frakshon di MAN kier a hasi algun pregunta na Minister di Desaroyo Urbano sra Zita Jesus Leitu:
• Minister ta na altura di e problemanan eksistente di e riolering den Otrabanda
• Ta bèrdat ku hospital nobo su riolering lo ser konektá riba e mesun sistema eksistente ku tur su problemanan ku konsekuensia negativo pe area.
• Ki plannan tin pa drecha e situashon. Kua ta e instansianan ku mester traha riba esaki pa aliviá e situashon promé ku habri Hospital nobo
• Kiko lo hasi pa aliviá e situashon di e awa ku holó malu ku tin den e area
Frakshon di MAN ta spera ku Minister lo hasi tur loke ta na su alkanse pa remediá e situashon aki pa evitá ku binimentu di hospital nobo lo krea un problema aún mas grandi pe area di Otrabanda i tambe e área turístiko.

Wimbert Hato
Parlamentario pa frakshon di MAN den parlamento di Kòrsou

%d bloggers like this: