Orashon djamars 29 di ougustus 2017

Orashon djamars 29 di ougustus 2017

“B’a saminá mi, SEÑOR, i konosé mi. Ku mi sinta o lanta, Bo sa,
ya djaleu B’a komprondé mi pensamentunan. Bo sa si mi ta kana o drumi,
unda ku mi bai, Bo sa. Ningun palabra no ta sali fo’i mi boka
ku Bo n’ tabata sabi e kaba, SEÑOR. B’a rondoná mi di patras i dilanti,
Bo a pone bo man riba mi. Tantu saber ta surpasá mi,
ta muchu altu pa mi logra kapt’é. Unda mi por hui bo spiritu,
unda mi por skapa fo’i bo bista? Ku mi subi bai shelu, Bo ta aya,
ku mi drumi band’i mortonan, Bo t’ei. Ku mi bula riba ala di ourora
baha na kosta di mas leu di laman: aya tambe bo man lo guia mi,
bo man drechi, sigur, lo tene mi. Ku mi bisa: ‘Skuridat por bien tapa mi
i klaridat bira anochi rònt di mi’, ni tiniebla no ta skur pa Bo,
anochi ta mes kla ku di dia,
skuridat i lus t’e mesun kos. Sí, B’a forma mi te den mi mondongo,
Bo a hila mi den barika di mi mama. Mi t’alabá Bo pasobra B’a traha mi
di un manera asombroso, un milager.
Hundu den mi kurason mi sa esei. Bo sa kon mi organismo a forma,
kon mi ta’ta krese den skondí,
bunita di flèktu den barika di tera. Fo’i promé ku mi a nase B’a mira mi;
e dianan ku Bo a pone pa mi,
den bo buki nan tur tabat’ei
promé ku un di nan a yega. Dios, ki profundo bo ideanan ta pa mi,
kuantu di nan tin na tur! Mas inkontabel ku pipita di santu!
I si akaso mi kaba di konta,
anto mi n’ ta kla ku Bo ainda. Dios, o kita bida di malbadonan,
— Bai, boso tur ku tin man tur na sanger! — ku ta papia riba Bo ku mal propósito,
ta usa bo nòmber sin mester, e enemigunan! Lo mi n’ odia, SEÑOR, es ku odia Bo
i despresiá es ku lanta kontra Bo? Mi ta odia nan di henter mi kurason,
for di awor nan ta mi mes enemigu. Dios, saminá mi i konosé mi kurason,
purba mi pa Bo sa mi pensamentunan. Mira pa mi n’ sigui mal kaminda,
guia mi p’e kaminda eterno!”

Salmo 139:1-24

%d bloggers like this: