Advertisements

Minister Koeiman a partisipá na reunion na Westpunt pa huntu ku e bario traha riba un mihó kalidat di bida

Minister Koeiman a partisipá na reunion na Westpunt pa huntu ku e bario traha riba un mihó kalidat di bida
WILLEMSTAD – Resien Minister Koeiman a ser invitá pa representantenan di kuerpo di polis, di Plataforma Banda Abou i Top-C na un enkuentro na Sentro di Bario Westpunt. Minister Hensley Koeiman tabata invitado spesial na e enkuentro ku tabata bou di direkshon sr. Regginald Huggins, bosero di Kuerpo di Polis. Tabatin alabes presente representantenan di algun organisashon mas di Banda Abou, algun individual di un tim di boluntario di bario di Westpunt i serkania ku a uni pa traha na solushonnan duradero di algun reto ku e bario di Westpunt ta konfrontá último añanan.
Durante di e periodo ku Minister Koeiman tabata minister presidènt a tuma luga un atrako brutal riba un pareha turista ku algun hóben di Westpunt a kometé. E tempu ei Minister Koeiman, Minister Gijsbertha i Minister Martina, (e tempu ei enkargá ku e kartera di hustisia) i kuerpo di Polis a tene un enkuentro ku respresentantenan di organisashonnan ku ta sali na interes di Banda Abou en general i Wespunt en partikular i algun abitante i empresario di e bario di Westpunt. Durante e reunion menshoná a informá ku pa solushoná e retonan di e bario, komunidat tambe mester uni forsa ku gobièrnu pa huntu traha na solushonnan. Despues di e reunion ei representantenan di kuerpo di Polis, i boluntarionan di organisashonnan di interes i individualnen a sigui reuní tur djarason pa purba yega na solushonnan duradero pa e retonan di e bario. Tambe a aktividatnan, manera un akshon di limpiesa, ku alabes a sirbi pa un teambuilding. Durante di e reunion ku Minister Koeiman, a informá e titular aktualmente enkargá ku e kartera di Desaroyo Sosial, Labor i Bienestar, di e nesesidat agudo pa yudansa riba tereno sosial ku hopi famia ta konfrontá den e bario. A hasi un petishon na Minister Koeiman pa enkargá algun profeshonal riba e tereno aki pa hasi un investigashon di e problemanan sosial di e bario, pa seguidamente traha un plan di akshon dirigí.
Durante di e enkuentro a trata alabes puntonan manera e nesesidat di mihó iluminashon di kaya i seguridat den e bario i tambe mehorashon di infrastruktura i fasilidatnan di e sentro di bario. Tambe a mustra riba e nesesidat pa duna preparashon na abitantenan di e bario pa haña un mindset empresarial pa asina abitantenan di e bario di Westpunt tambe por yuda stimulá i saka mihó probecho di e desaroyo di e industria turístiko den e bario . Hasiendo esakinan komunidat den union por traha na prevenshon di push-outs i oumento di kriminalidat.
Tin 5 prioridat ku a skohe pa e Bario di Westpunt ku ta; limpiesa den bario, upgrading di Sentro di Bario, trahadó soshal, warda di Polis pa Westpunt i siguridat.
Tambe a trata e importansha pa tin un ‘sociale kaart’ pa e bario i e nesesidat di trahadónan soshal pa guia i konsehá mayornan ku hopi biaha ta man na kabes. Formashon di hóbennan ta un nesesidat agudo. Alabes mester buska solushonnan pa desempleo ku ta hopi haltu den e bario.
Minister Koeiman a primintí ku e ministerio di SOAW lo perkurá pa apuntá trahadónan sosial pa hasi un sondeo di e situashon soshal serka famianan di e bario pa asina por traha plannan di akshon dirigí, efisiente i ku e meta di alkansá resultadonan duradero. Alabes e ministerio di SOAW lo hasi tur loke ta na su alkanse bai traha riba upgrading di e Sentro di Bario. Lo bai duna esaki un operashon multi-funshonal atraktivo pa tantu hóbennan, komo abitantenan di mas edat por bini traha riba nan formashon i rekreá. Minister Koeiman a bisa ku e tin den su plannan di akshon pa organisá trainingnan riba diferente nivel ku trahadónan di SOAW i tambe algun profeshonal eksterno por duna. Westpunt tambe lo ser inkluí den e barionan ku lo risib;i e trainingnan. Minister Koeiman a menshoná trainingnan pa formashon manera entre otro; bon aktitut pa trabou, un mindset korekto, kon pa solisitá i presentá i komportá ora di hasi solisitut i tambe ora di ta na trabou mes. Pa asina mantené e trabou ora haña esaki.

Advertisements
%d bloggers like this: