GRAN ASISTENSHA NA PRESENTASHON DI DELEGASHON DI KÒRSOU NA HAITI A DEMONSTRÁ KU HAITIANONAN AINDA TA HOPI INTERESÁ PA KUMPRA NA KÒRSOU

GRAN ASISTENSHA NA PRESENTASHON DI DELEGASHON DI KÒRSOU NA HAITI A DEMONSTRÁ KU HAITIANONAN AINDA TA HOPI INTERESÁ PA KUMPRA NA KÒRSOU
Willemstad- Willemstad 27 di Ougùstùs 2017- E merkado Haitiano ainda ta sumamente interesá pa hasi negoshi ku Kòrsou i prinsipalmente ku negoshinan den zona ekonómiko. Durante di un presentashon tene na Port au Prince dia 23 di ougùstùs último, un delegashon di Kòrsou a tene un presentashon ku a konta ku bon asistensha. E Minister enkarga ku Komersio i Industria di Haiti Sr. Pierre Marie Du Mèny mes tabata presente na e presentashon.
E partnernan Sunrise Airways, Curinde, CPost International, Ministerio di Desaroyo Ekonómiko i Ofisina di Turismo Kòrsou, a uní forsa i perkura pa un bon base pa reestablesé Kòrsou komo un destinashon di kompra pa e merkado di Haiti. Sunrise Airways pronto lo kuminsá ku buelonan direkto entre Haiti i Kòrsou.

Haiti tradishonalmente tabata un merkado importante pa nos zona ekonómiko den pasado. Ta pa e motibu aki tambe Curinde ta aktivamente hasiendo e.o. promoshon riba e merkado di Haiti pa atrae kumpradónan pa bin kumpra den nos zona ekonómiko. E presentashon aki na Haiti ta pas den e esfuersonan struktural realisá pa Curinde. Durante di e evento Curinde di su parti a duna un presentashon tokante su portal di benta ku pronto lo keda lansá. CPost International a eksponé su servisio pa atendé ku merkansianan ku e komersiante Haitano a kumpra den zona ekonómiko mientras ku Sunrise Airways a elaborá riba su skema di buelonan entre Haiti i Kòrsou, i Ofisina di Turismo di Kòrsou tabata enkargá ku promoshon di sektor hospitalario, kaminda di kome ets. Durante di e seshon di informashon, empresanan di Shivas Free Zone i M.P.J. International, ambos establesé den nos zona ekonómiko na Koningsplein, a tene presentashon ilustrando produktonan ku e komersiante Haitiano por haña den nos zona ekonómiko. Un tópiko ku sigur tabatin basta pregunta riba dje ta e asuntu di visa pa bini Kòrsou. E partnernan den e esfuerso aki a kumbiní ku lo traha riba puntonan ku a bin dilanti i ku meresé atenshon pa asina Kòrsou por bolbe disfruta di e potenshal ku e merkado Haitano tin pa Kòrsou.

E ehersisio aki ta parti di un esfuerso kombiná di e.o. Direktorado pa Asuntonan Eksterior i Ministerio di Desaroyo Ekonómiko, enkabesá pa Curinde huntu ku Sunrise Airways, pa oumentá mas aktividat ekonómiko den nos zonanan ekonómiko.

%d bloggers like this: