Advertisements

FRAKSHON DI MAN KIER SA SI GOBIERNU TA BAI HASI UN EVALUASHON DI E 1 FLORIN DI RECEPTEN REGELING VERGOEDING.

FRAKSHON DI MAN KIER SA SI GOBIERNU TA BAI HASI UN EVALUASHON DI E 1 FLORIN DI RECEPTEN REGELING VERGOEDING.

Ta konosí ku pa hopi persona, ku uso haltu di remedi pa nan malesanan króniko,e kontribushon di un florin pa suministro di kada remedi preskribí ta un peso riba nan pòtmòni. Ku konsekuensia ku nan no por paga i ta opta pa no tuma e remedinan aki pasombra nan mester di e sèn aki pa otro nesesidat nan básiko di bida.Esaki ta trese kuné ku pashèntnan aki ta kore e rísiko di atkerí konsekuensia serio pa ku nan malesa i ku e resultado ku e gastu aki ta bin bèk pa kuenta di gobièrnu ,esta SVB.Hopi biaha tambe botikanan òf empleadonan di botikanan ta opta pa paga e 1 florin aki pa asina sòru ku e kliente por haña su remedinan ku doktor ta preskribí.
No ta un sekreto públiko ku Kòrsou su gastunan pa ku remedi ta hopi haltu, pa diferente motibu.
Gastunan farmaseutiko tabata na 2009 tabata 120 mion florin unda mas o ménos 27 mion ta relatá na suministro di remedi na públiko via botika nan.
E rapòrt ONA(Onderzoek Norminkomen Apothekers) a hiba gobièrnu na e desishon di 9 di novèmber 2011, nr. 2011/87480, pa implementashon di un RRV (Recepten Regeling Vergoeding)fiho na botikanan ku a wòrdu ankra den un akuerdo entre SVB i botikarionan na un tarifa fiho di 7 florin pa kada remedi preskribí. E medida ku a sali for di e rapòrt di ONA su intenshon tabata pa resultá den un bahada di gastu na botikanan di 6,6 mion florin. Esaki mester tabata e resultado di e RRV fiho na f 7,= huntu ku un kontribushon propio di e asegurado di 1 florin riba kada remedi. Meta di esaki tabata pa redusí e uso di remedinan innesesario, mirando ku na Kòrsou tabata preskribí dòbel mas tantu remedi per kapita (20) kompará ku e.o. pais bisiña di Aruba i tambe Hulanda (10),segun OECD (The organization for Economic Cooperation and Development).

Tambe gobièrnu a lanta un komishon ku yama Verlaging Kosten Geneesmiddelen (VKG) ku e meta ba redusí gastu riba preisnan di remedi di e importadónan di remedi. E desishon di gobièrnu ku a sali for di esaki tabata tin e meta pa maksimalisá e preisnan di remedi, desishon nr. 2012/7784 di 22 di febrüari 2012. Implementashon di e trayekto aki lo mester a redunda den un bahada di gastunan pa e fondo públiko di 19,6 mion florin.
Aparte di e desishon aki, SVB, despues di a trese e fondonan públiko huntu, a introdusí preskripshon di remedinan genériko ku ta finalmente mas barata ku esnan di marka.

Si e implementashon di e medidanan ariba menshoná, esta
– RRV fiho na f 7,-
– Kontribushon propio di konsumidó di remedi di f 1,- pa kada remedi
– Maksimalisashon di preisnan di remedinan di marka (FOB + Assurantie + Invoerrechten + winstmarge 20% importeur)
– Introdukshon di remedinan genériko mas barata.

Frakshon di MAN ta ke sa si e metanan di e maneho di gobièrnu riba tereno di kuido farmaseutiko aki a yega e metanan finansiero pa asina gobièrnu di Kòrsou di un manera responsabel revisá i yega na eliminashon di kontribushon propio di e konsumidó di remedi di f 1,= i asina SVB bai over na un akuerdo nobo ku e botikarionan pa un RRV di f 8,= enbes di f.7,=.

Pa por yega na e proposishon aki ku lo trese alivio pa pueblo mi ta hasi e siguiente preguntanan mi ta hasi Minister di Salubridat I Medio Ambiente sra.S.Camelia –Romer :

1) Kiko e efekto di un RRV fiho na f 7,= ku a wòrdu introdusí dor di SVB enbes di e konseho den e rapòrt di ONA a resultá na dje?
2) A logra e meta finansiero (bahada di 6,6 mion) ku introdukshon di e RRV fiho?
3) Kuantu ta e gastunan aktual di SVB na e botikanan?
4) Kon e kantidat di remedi per kapita a desaroyá entre 2012 pa 2016?
5) Kiko ta e efekto ku e kontribushon propio di e asegurado a resultá riba e kandidata di remedi per kapita entre 2012 pa 2016?
6) Kiko ta e efekto ku e kontribushon propio di e asegurado a resultá riba e fondo di SVB entre 2012 pa 2016?
7) Kiko ta e pasonan tuma pa drecha e preskripshon di remedi dor di médikonan?
8) Kon SVB ta kontrolá pa preskripshon di remedi ta mas kosto-efektivo posibel?
9) Tin un koperashon entre médikonan i botikarionan pa mehora e kosto-efektividat di e preskripshon di remedi?
10) Kon e areglo pa botikarionan remplasá remedinan preskribí ta ?
11) Kon e asegurado di SVB ta wòrdu informá riba kambio di remplaso di su remedinan?
12) Kua ta e posibilidat pa un asegurado keda riba su remedi di marka sin ku esaki wòrdu remplasá pa remedi genériko?
13) Kon e asegurado di SVB i pueblo en general ta wòrdu informá di introdukshon di remedinan genériko?
14) Kua parti di e merkado di remedi ta genériko i kua parti ta remedi di marka?
15) Kon e asegurado di SVB i pueblo en general ta wòrdu informá di remedinan ku e seguro básiko no ta kubri?
16) Kon ta yega na e desishon kua remedinan lo no wòrdu kubri pa seguro básiko (zgn negatieve lijst)?
17) Kua tabata e efekto di e maksimalisashon di e preisnan di remedi for di febrüari 2012?
18) Den kuantu bahada di e gastunan di remedi ( 96 mion na 2009) esaki a resultá den e aña na 2012 t/k 2016?
19) Kual ta efekto finansiero logra ku introdukshon di remedinan genériko?
20) Kual ta e bahada di gastunan total di kuido farmaseutiko den e aña nan 2012 t/k 2016?
21) Ta faktibel pa eliminá e kontribushon propio di e asegurado riba remedi pa aliviá pueblo?
22) Kiko lo ta e gastunan ku esaki lo trese kuné pa e fondo di kuido?
23) Si akaso no ta posibel eliminá e kontribushon aki, ta posibel ku gobièrnu por bini ku un maneho pa e klientenan di SVB ku ta kobra ònderstant i esun nan ku solamente tin e entrada di AOV un eksonerashon di e 1 florin aki di kontribushon propio di remedi?

Parlamentario pa frakshon di MAN
Giselle Mc William

Advertisements
%d bloggers like this: