Minister Koeiman ta reinstituí programa ‘Mi ke, Mi Por’ pa konsientisá i duna guia

Minister Koeiman ta reinstituí programa ‘Mi ke, Mi Por’ pa konsientisá i duna guia
Na personanan ku gobièrnu ta bai yuda ku nan debe di awa i/òf koriente
WILLEMSTAD – Dia 24 di ougùstùs 2017, Ministerio di Desaroyo Sosial, Labor i Bienestar a reinstituí e programa “Mi Ke, Mi Por’. Esalo ta un programa pa konsientisá, forma i duna guia na personanan ku Gobièrnu ta yuda via di un programa sosial pa nan ser rekonektá riba ret di awa i òf koriente. E programa tin komo meta ku e personan no ta bolbe kai den un sírkulo visioso ku kontinuamente no ta kumpli ku kompromisonan básiko. Ministerio di SOAW tabata ehekutá e programa kaba durante e periodo ku Minister Koeiman tabata enkargá ku e kartera di Desaroyo Sosial, labor i Bienestar entre añanan 2010 pa 2012.
Awe mainta a duna inisio na un trayekto pa un kantidat di kabes di famia den área di Montaña i besindario. E programa ta na enkargo di sra. Militza Riedel- Rafaela i lo tuma lugá na sentro di bario Montaña i mas serka posibel di e partisipante.
Mediante e programa aki partisipantenan ta siña entre otro; e nesesidat di un presupuesto, kon traha un presupuesto i kon pa tene bo mes na bo presupuesto. Tambe ta siña kon pa hasi uso mas efisiente di awa i koriente. Aalabes lo traha riba e aspekto sikológiko di e problemátika di debe i kon ta konsolidá debe. Partisipantenan lo risibí formashon riba vários tereno mas i tambe guia personal. En general lo traha dirigí riba empoderashon di partisipantenan na e programa.
Manera Minister Koeiman a primintí na vários okashon, e ministerio pa Desaroyo Sosial, labor i Bienestar, lo bai ta mas den bario i mas serka di e habitante. E programa Mi ke, Mi Por, ta un di e vehikulonan ku e Ministerio pa Desaroyo Sosial, Labor i Bienestar ta apliká pa invertí den e siudadano pa e por sigui partisipá di un forma positivo i produktivo na bienestar di su mes, su famia i nos komunidat.

%d bloggers like this: