SKAIH Pre-Universitario Bilingwe awor afiliá na NUFFIC.

SKAIH Pre-Universitario Bilingwe awor afiliá na NUFFIC.

KOMUNIKADO. Willemstad, 23 ougùstùst 2017

Fundashon Skol Humanista na Papiamentu (FSHP) ta den “full swing” pa e aña eskolar aki hasi tur preparashon nesesario pa na ougùstùs otro aña (2018) risibí e promé alumnonan ku lo sigui nan estudio riba nivel di havo/vwo na dos idioma, Papiamentu i Ingles.

Pa garantisá kalidat di enseñansa bilingwe ku e alumnonan ta risibi Fundashon Skol Humanista na Papiamentu (FSHP) a afiliá komo miembro di NUFFIC.

Na Kòrsou NUFFIC ta mas konosí komo e instansia ku ta balorá diploma. NUFFIC ta tambe e organisashon ku ta enkargá ku kòntròl di kalidat i stimulashon di skolnan bilingual. E ta punto sentral di kordinashon di enseñansa bilingual.

NUFFIC ta enkargá ku sertifikashon di skolnan ku ta kumpli ku e sèt di eksigensianan di kalidat pa enseñansa bilingwe. Skolnan ku ta kumpli ta haña e predikado “Junior College” òf “Senior College”.

Aparte di esei NUFFIC ta traha na desaroyo di enseñansa bilingwe, duna informashon i asesorá skolnan ku ta bai kuminsa riba diferente tereno e.o. dor di duna “training” atrabes di “NUFFIC Academy”.

Palabrashon. Den luna di yüli FSHP i NUFFIC a yega na palabrashonnan final di e miembresia di SKAIH Pre-Universitario ku lo inisiá na kuminsamentu di e aña skolar aki, ku pa SKAIH Pre-Universitario ta un aña di preparashon. Entre otro a keda palabrá ku SKAIH ta kuminsa ku un klas bilingwe na ougùstùs 2018. Na ougùstùs 2020 e inspekshon nesesario pa sertifiká e skol ta tuma luga. A palabrá ku lo tene kuenta ku e konteksto partikular di miembresia di SKAIH ora bishita e skol.
A yega tambe na palabrashon ku e futuro direktor di SKAIH Pre-Universitario lo sigui e preparashon ofishal pa kordinadó di enseñansa bilingwe ku lo kuminsa na òktober awor. SKAIH Pre-Universitario además lo disidi na kua aktividat di e ret di skolnan bilingwe dosentenan di SKAIH Pre-Universitario lo por partisipá durante aña.

%d bloggers like this: