Kontesta di Minister Armin Konket riba pregunta di Staten

Honorabel señora Pauletta,

Den bo karta fechá 10 di yüli 2017 i ku tin komo topiko ‘Klaridat tokante problema pa renobá pasport’ bo ta referí na personanan ku a optené e nashonalidat Hulandes i ku den pasado a yega na renobá nan pasport Hulandes na varios okashon sin ningun difikultat, pero ku despues esei no tabata posibel. Den e karta aki gustosamente mi ta kontestá bo preguntanan. Primeramente mi ta ofresé un kuadro general.

Optene i pèrdèmentu di Nashonalidat Hulandes (Pasport) ta reglá na nivel di Reino
Nashonalidat Hulandes, manera ta reglá den Statut pa Reino, ta un asuntu di Reino. Na Kòrsou nos Gobernador, komo representante di Reino, ta e outoridat ku ta aseptá petishon i otorgamentu di pasport Hulandes. Gobernador, den ámbos kaso, ta aktua den konsulta ku outoridatnan asigná pa minister (di Hulanda) di Asuntunan Interior i Relashonnan den Reino. Gobernador den e kasonan aki ta kumpli estriktamente ku reglanan stipulá dor di e minister aki. Revokashon di un pasport tambe ta tuma lugá konforme reglanan ku a keda stipulá pa minister (di Hulanda) di Asuntunan Interior i di Relashonnan den Reino. E reglanan aki ta butá den ‘Besluit verkrijging en verlies Nederlanderschap’. Otro leinan di Reino relevante den e kaso aki ta ‘Paspoortwet’ i e ‘Naturalisatiewet’.

Minister di Reino por disidí na revoká Nashonalidat Hulandes optené o otorgá a base di iregularidat
‘Rijkswet op het Nederlanderschap’ ta regla e diferente formanan riba kua un mucha por optené nashonalidat Hulandes outomátikamente. Un di e formanan ta pa medio di rekonosementu di yu(nan) di un mama estranhera dor di un hòmber di nashonalidat Hulandes. T’asina ku Reino, ya for di 2008, a bini ta instruí pa dediká atenshon speshal na personanan di partikularmente prosedensia Dominikano kendenan pa medio di rekonosementu a optené nashonalidat Hulandes. Ta trata pues di muchanan ku un mama Dominikana ku ta ser rekonosé dor di un tata di nashonalidat Hulandes ku no ta nan tata biológiko. Dor di esaki e muchanan aki outomátikamente ta optené e nashonalidat Hulandes. A resultá ku den varios di e kasonan aki a suministrá informashon ku despues a resultá di ta inkorekto of engañoso.

Lei di Reino ta preskribí ku tur ámtenar ku den kuadro di su trabou tuma nota di deklarashonnan sea falsu, engañoso of skondementu di kualke echo relevante ku a kondusí na otorgamentu of optenementu di nashonalidat Hulandes, mester raportá esaki inmediatamente. Eventualmente huntu ku e dokumentonan korespondiente.

Lei ta preskribí tambe ku e minister di Reino konserní por revoká/kita e nashonalidat Hulandes for di un persona ku a optené esaki a base di p.e. engaño. E minister den esaki ta tene kuenta ku e grado i gravedat di e engaño o falsifikashon, posibel situashon di kedamentu sin nashonalidat di esun enbolbí komo tambe e tempu ku a transkurí desde ku a optené e nashonalidat Hulandes i otro faktornan relevante.

Ta asina tambe ku tabatin kasonan den Korte di Hustisia kaminda Hues a dikta ku si un iregularidat òf ilegalidat a kondusí na atkerimento òf otorgamentu di nashonalidat Hulandes, ku e atkerimento o otorgamentu aki ta bira ilegítimo.

Kontesta riba e preguntanan:

Pregunta 1:
Minister por informá Parlamento kua ta e proseso rekerí na momentu ku un siudadano ku nashonalidat Hulandes tin ku renobá su pasport?

Kontesta:
Gustosamente mi ta referí na kapítulo 4 di ‘Paspoortwet’. Pa mas esakto artíkulonan 28 te ku 39. Mi diskulpa ku den e konsteksto aki mi no por tradusí tur e artíkulonan aki.

Pregunta 2:
Minister lo por informá Parlamento si tin kasonan spesial kaminda ku un siudadano lo tin ku di hasi un investigashon adishional pa renobá su pasport?

Kontesta:
Gustosamente mi ta referí na artikulo 65 di e ‘Besluit verkrijging en verlies Nederlanderschap’ ariba menshoná. E artíkulo ta stipulá ku e ámtenar ku ta enkargá ku p.e. asuntunan di naturalisashon i ku den kuadro di su trabou tuma nota di deklarashonnan sea falsu, engañoso of skondementu di kualke echo relevante ku a kondusí na otorgamentu of optenementu di nashonalidat Hulandes, mester raportá esaki inmediatamente. Eventualmente huntu ku e dokumentonan korespondiente.
Ta posibel pues ku den un esfuerso pa verifiká sierto informashon ta nesesario hasi investigashon adishonal.

Manera a keda spliká mas ariba ta asina ku Reino, a base di sierto eksperensia spesífiko, for di 2008, a bini ta instruí pa dediká atenshon speshal na personanan, partikularmente di prosedensia Dominikano, kendenan pa medio di rekonosementu a optené nashonalidat Hulandes.

Pregunta 3:
Ku indulgensia di Minister, ta kuadra ku tin siudadano ku despues ku nan a risibí nan nashonalidat Hulandes por pèrdè esaki dor di investigashon ku Kranshi ta hasi?

Kontesta:
Kranshi no tin otro opshon ku no ta sigui loke e lei di Reino ta preskribí. Den kaso ku tin indikashon di posibel kaso di otorgamentu of optementu di nashonalidat Hulandes den pasado ku a tuma lugá a base di deklarashonnan sea falsu, engañoso of skondementu di kualke echo relevante, anto Kranshi ta obligá na investigá. Si resultá ku esaki en berdat ta e kaso, anto ta posibel ku minister di Hustisia di Hulanda den su kalidat di minister di Reino ta tuma tal desishon den sentido ku e pesona en kuestion ta pèrdè e nashonalidat Hulandes. Tin diferente kaso den kua esaki a tuma lugá.

Pregunta 4:
Minister lo por informá Parlamento ku si tin kasonan spesial den kual tin nesesidat pa hasi un investigashon mas profundo, esaki ta un maneho ku ta konta pa tur 4 paisnan den reino Hulandes?

Kontesta:
No tin motibu pa pensa ku demas instansianan enkargá ku ehekushon ku e diferente leinan di Reino riba e tereno aki lo no ta ehekutá nan konforme e leinan i instrukshonann ku ta bini di e minister di Reino responsabel.

Pregunta 5:
Si tin dicho investigashon, Minister lo por kontestá si tin seshonnan di informashon o konsientisashon pa e grupo di siudadano aki?

Kontesta:
Gobièrnu, ultimo lunanan, a bini ta suminstrá informashon den medionan di prensa. Tambe ta asina ku tin seshonnan planeá den kua lo informá e grupo di siudadano aki. Ademas, ‘Kranshi’ ta den kontakto ku vários konsulado tokante e tópiko aki.

Atentamente,

____________________________________
Drs. Ing. Armin E. Konket
Minister di Maneho di Gobernashon, Planifikashon i Servisio Públiko
[pdf-embedder url=”https://kikoapasa.com/wp-content/uploads/Konket-Klaridat-tokante-problema-renobashon-pasport.pdf” title=”Konket Klaridat tokante problema renobashon pasport”]

[pdf-embedder url=”https://kikoapasa.com/wp-content/uploads/Pauletta-Klaridat-tokante-problema-renoba-pasport.pdf” title=”Pauletta Klaridat tokante problema renoba pasport”]

%d bloggers like this: