Advertisements

Gobièrnu di Kòrsou ta pone atenshon na dia Internashonal pa Rekordá Komèrsio di Katibu i su Abolishon.

23 ougùstùs 2017
Gobièrnu di Kòrsou ta pone atenshon na dia Internashonal pa Rekordá Komèrsio
di Katibu i su Abolishon.

Charla i Eksposishon

Minsterio di Enseñansa, Siensia, Kultura & Deporte den koperashon ku Fundashon NAAM, UNESCO Kòrsou, Plataforma Sklabitut i Herensia di Sklabitut huntu ku Plataforma Dékada Internashonal di Afrodesendiente ta organisá un charla relashoná ku Dia Internashonal pa Rekordá Komèrsio di Katibu i su Abolishon.

E charla aki lo keda tres’é pa Sr. Richinel Ansano, direktor di NAAM i Koordinadó Plataforma Dékada Internashonal di Afrodesendiente. Tambe lo tin un eksposishon ku resientemente a keda produsí pa e plataforma.

Doshen aña despues di e lastu tratado pa abolí komèrsio di katibu transatlántiko Mundu ta para ketu na nesesidat di atendé ku e herensia di negoshi di katibu i di sklabitut. E negoshi di katibu ku a sigui krea kondishonnan inhustu tantu pa e desendientenan Afrikano den diáspora komo pa e komunidatnan ku a eksperensiá sklabitut.

Na 1998 UNESCO a dekretá 23 di ougùstùs komo Dia Internashonal pa Rekordá Komèrsio di Katibu i su Abolishon. Alabes e desishon di Nashonnan Uní pa deklará 2015-2024 Dékada di Afrodesendiente ta indiká ku ainda falta basta pa atendé despues di e abolishonnan di negoshi di katibu di siglo 19.

E negoshi aki i e sklabitut ku e tabata mará na dje a transformá di e atrosidatnan di tempu di sklabitut pa sistemanan di opreshon modèrno ku mester eliminá. Esaki mester sosodé a base di rekonosementu, hustisia i desaroyo, e tres puntonan ku Nashonnan Uní a pone komo base pa e dékada. Netamente basá riba esaki Gobièrnu di Kòrsou a konfirmá Tula komo nos Héroe Nashonal.
Konforme nos akuerdo di gobernashon Gobiernu ta pone enfoke na formashon di kada suidadano pa realisá e máksimo potensial. Ta pa e motibu aki mester ban duna balor na nos herensia dor di rekonosementu hustu pa e desaroyo di nos mes hendenan.

Rekonosementu ta enserá e derechi pa igualdat i no-deskriminashon, edukashon i konsientisashon tokante igualdat, kolekshonamentu di informashon tokante e afrodesendiente i su kondishonnan sosial ku enfoke riba e partisipashon sosial.

Hustisia ta para tantu pa akseso na e sistema hudisial komo pa konsiderashon di medidanan spesial pa drecha e kondishonnan di hustisia pa afrodesendiente.

Desaroyo ta pone énfasis riba derechi di por desaroyá sosialmente i haña protekshon kontra pobresa. Tambe e ta enfatisá e derechi di haña akseso na edukashon, empleo, infrastruktura di salubridat i di bibienda, ku e meta pa eliminá retraso sosial den e áreanan aki.

Ta di sumo importansha pa nos enfoká riba e balornan aki ku nos Héroe nan Nashonal di pasado tabata tin for di un prinsipio.

E enkuentro lo tuma lugá na Fundashon NAAM den Pietermaai, dia 23 ougùstùs 2017 di 7’or pa 9’or di anochi. Tambe lo tin un eksposishon ku lo keda habrí enkonekshon ku e tema. E eksposishon lo ta habrí te ku dia 30 di ougùstùs di 10’or pa 4’or.

Komunikashon
Ministerio di Enseñansa, Siensia, Kultura & Deporte

Advertisements
%d bloggers like this: