Elsa Rozendal di MAN: Atrobe nos mucha hòmbernan ta keda atras

Elsa Rozendal di MAN: Atrobe nos mucha hòmbernan ta keda atras

Na komienso di kada aña eskolar nobo ta bon pa tene kuenta ku analisisnan hasí den pasado pa loke ta trata komportashon i prestashon di nos muchanan.
For di awor mester perkurá ku tin tur e ingredientennan pa nos muchanan por keda bon prepará i guiá pa nan por tin bon resultado na fin di aña eskolar. Si nos mira, por ehèmpel, ku e aña aki atrobe resultado di EFO toets a mustra ku e mucha muhé a skor mas haltu ku e mucha hòmber, esta ku e mucha muhé pa gran parti a skor pa bai HAVO i e mucha hòmber pa gran parti pa bai VSBO/AGO, mester hasi tur esfuerso pa perkurá ku tantu mucha muhé i tambe mucha hòmber por skor mas haltu ku ta posibel pa nan efotoets. Mester stimulá nos mucha hòmbernan mas tantu den e direkshon ei. E resultado aki por sierto ta ripití tur aña di nobo.
Den e kuadro aki Parlamentario Rozendal a manda un karta pa Minister di Enseñansa, Siensia, Kultura i Deporte, sra. Marilyn Alcalá Wallé pa sa entre otro sin tin un maneho di “Igualdat di Género” den enseñansa aki na Kòrsou, i si tin un maneho pa skolnan duna mas guia na nos mucha hòmbernan pa nan tambe por yega na un resultado mas haltu. Mas aleu e Parlamentario a puntra den su karta si den kuadro di e rapòrt “The Boy Problem”, a sigui e rekomendashonnan menshoná den e rapòrt i kiko ta e Minister su vishon i maneho pa ku e fenómeno “ The Boy Problem”.

%d bloggers like this: