E kantante a check-in na Renaissance Curaçao Resort pa e anochi di konsierto: Izaline Calister ta ready pa ‘Caribbean Queens’

E kantante a check-in na Renaissance Curaçao Resort pa e anochi di konsierto:
Izaline Calister ta ready pa ‘Caribbean Queens’

Willemstad – AUG – Izaline Calister ta ready pa Caribbean Queens. E kantante ta disfrutando algun dia na Kòrsou den gran antisipashon pa e konsierto. Resientemente Renaissance Curacao Resort a risibí e Izaline Calister durante di su ‘check-in’. E resort lo ta Izaline su ‘kas’ pa e próksimo dianan miéntras e lo ta preparando pa Caribbean Queens, ku lo tuma lugar djasabra dia 26 di ougùstùs próksimo. Riba e anochi spesial aki, Renaissance Curaçao Resort ta presentá 3 dama den konsierto, kada un di nan ku nan propio agrupashon musikal. Mafalda Miguel, Shirma Rouse i Izaline Calister.

Izaline Calister tin mester di masha poko introdukshon. E ta ganador di premio ‘Edison’ 2009, i a bin ta hiba un karera eksitoso ya pa 13 aña kaba komo kantante i kompositor. Ku su manera koutivante di presentá a krea un públiko leal ku ta sigui Izaline su karera di serka i ta presensiá kada un presentashon di dje. Su músika ku ta revitalisá, su tekstonan den su propio idioma Papiamentu a sá di hala atenshon mundialmente. Kansionnan manera Wow’i Kariño, Kanta Hélele, Sa Sa Na Awasa i Bendishoná a duna e kantante Antiano puesto number 1 riba vários kartelera musikal den Caribe. Su disko kompaktonan manera Soño di un Muhé, Mariposa, Krioyo, Kanta Hélele i Speransa a wòrdu lansá mundialmente. Izaline su músika ta un fushon di músika ‘krioyo’ kombiná ku Jazz, pero ku influensianan Afro-Caribense. Izaline a realisá vários presentashon na Europa, Indonesia, Merka i Latinoamérika i a presentá den vários festivalnan tantu lokal komo International manera Cape Town Jazz Festival, Rome Jazz Festival, Cervantino Festival Mexico i North Sea Jazz Festival. Su mas resiente éksito ‘Reina Di Pordon’ lo ponebo baila sigur durante di e próksimo Caribbean Queens!

E Ocean Front Park na Renaissance Curaçao Resort lo keda kombèrtí den un anfiteater pa presentá Caribbean Queens. Karchi general pa Caribbean Queens ta kosta Nafl 55 i ta optenibel na Mensings Caminada, Bruna i 24 Uur uit de Muur. Ticket VIP lo wòrdu bende eksklusivamente na frontdesk di e hotèl. Karchinan VIP ta inkluí 2 bòter di bebida, 2 snacks i seating preferensial. Pa mas informashon tokante benta di karchi, VIP, pakete ‘Stay Over’ òf e konsierto por bishitá e página di Facebook di Renaissance Curacao Resort.

%d bloggers like this: