Medidanan tuma kontra pueblo pa ingreso den kaha di gobièrnu a krea un parálisis ekonómiko i awor nos ta bibando den un Krísis Ekonómiko

Willemstad, 18 di ougùstùs 2017

Presidente di Parlamento
Señor W. Millerson
Wilhelminaplein # 4
Presente

Tópiko: Petishon reunion públiko riba aktual parálisis-krísis ekonómiko ku Kòrsou ta den dje vs plan/akuerdo di Gobernashon 2017-2021 “Realisando e Máksimo Potensial di Kòrsou i e maneho general ku lo hiba den e akuerdo firmá dor di PAR-MAN-PIN pa e próksimo 4 añanan, konforme art. 64,

Señor Presidente,

Frakshon di Movementu Futuro Kòrsou (MFK) a tuma nota ku a presenta na Staten e akuerdo di Gobernashon di Gabinete Rhuggenaath 2017-2021 “Realisando e máksimo potensial di Kòrsou” ku no ta mucho diferente for di e akuerdo di Gobernashon firmá pa mesun partidonan MAN i PAR “Dignidat humano ta sentral” 2016-2020 un par di luna promé alegando un biaha mas ku lo tin atenshon en espeshal riba enseñansa, formashon i kobatimentu di pobresa.

Tumando nota ku nos ekonomia ta den un parálisis total danki na tur e medidanan deskabeya promové i adoptá dor di mayorianan den Parlamento ku a sostene Gabinete Betrian/Hodge/Asjes i Whiteman ta imperativo tende ta kua direkshon ta kanando pa sali for di parálisis sosio-ekonómiko ku a hinka nos den dje.

Nos kontrakshon ekonómiko pa e ultimo 5 añanan ta den un esfera negativo;
1. aña 2016 a sera ku -1.0% negativo,
2. awe na 2017 nos ta na -1.6% atrobe den negativo
3. i nos turismo tambe ta den tendensia negativo markando puntonan negativo
(awe ya alrededor di -10%).

No opstante di tur e akuerdo nan i protokòl nan firmá ku diferente organisashonnan privá (VBC/KVK/Plataforma di Dialogo Nashonal) durante 2013/2014/2015/2016 a resultá ku niun di e akshon nan ku a nase di e akuerdo nan aki a duna resultado alkontrario a empeorá e situashon mas ku nunka, i tur kos ta indiká ku aña 2017 lo sera ku un kontrakshon di
-2.0%.

Tambe nos debe nashonal ta yegando bek na un total di 3000 mil mion florin di debe ku entre otro a wordu fiá pa paga claimnan/meer kosten etc etc di proyektonan i
no tabata pa e invertí den nada ku a impulsá nos situashon dekadente sosio-ekonómiko.

Mirando ku na e momento ku e reunion aki tuma lugá ya Gabinete Rhuggenaath ta kumpliendo su 100 dianan di gobernashon i mucho efekto ni entusiasmo no a surgí den nos ekonomia nos ta sugerí pa amplia e tempu di primera tanda i segunda tanda di tal manera ku e ta sufisiente (1era tanda 30 minüt i 2da tanda 15 minüt) pa por atende tur e kapítulonan intenhsoná pa maneha den e próksimo 4 añanan.

Atentamente,

=======================

Medidanan tuma kontra pueblo pa ingreso den kaha di gobièrnu a krea un parálisis ekonómiko i awor nos ta bibando den un Krísis Ekonómiko

Willemstad, 20 di ougùstùs 2017

Frakshon di MFK a atvertí ku e medidanan ku a tuma riba nos pueblo lo kolèps nos Ekonomia i awe nos por tuma nota ku e medidanan aki kual nan ta entre otro;

– Subida di OB na 9%
– Oumentu di prima di lei di seguro básiko 10% i kitando benefisiosonan médiko for di e pakete di SVB
– Kambio di “Grondbelasting” den “Onroerendzaakbelasting” kobrando pueblo mas sèn riba nan kas i tambe tereno
– Introdukshon di belasting riba sèn ku pueblo ta spar etc etc.

E medidanan ariba menshoná tin nos ekonomia strangula i sin perspektiva pa un kresementu ekonómiko.

Tantísimo reunion nan públiko ku MFK a partisipá, tratando di blòkia medidanan kontra pueblo i komersio, kaminda no kier a skucha nos, a insultá nos di tur forma indikando na nos ku e tim gobernando e pais ta e ekspertonan bon ekipá i studia ku ta bai saka e pais dilanti. Ku no opstante aña 2013, 2014 lo ta añanan di “ousteridat” a primintí den parlamento ku e gobièrnu lo invertí 270 mion florin den ekonomia i duna pueblo bek na 2015 i 2016, pero lamentablemente nada di esaki no a tuma lugá.

Awe e realidat ta ku nos ta den un parálisis ekonómiko ku a bira ya un krísis ekonómiko, 2016 a sera ku kontrakshon di -1.0% (negativo), awe na 2017 nos tin atrobe un kontrakshon di -1.6% (negativo) i aña no a kaba ainda i nos turismo tambe ya den tendensia di sifranan negativo alrededor di -10% overòl.

Si esaki nos ta sufisiente aña 2017 a habri tambe ku un fenómeno intolerabel pero ku pa motibu di keda sin kontrolá pa hopi aña rigorosamente tin un “free for all” ku ta peligrá salú di pueblo i ku nos pueblo ta preokupá den tur lokual ku ta trata komestibel i kuminda ku nos ta kumprando pa konsumo propio i di nos famia.

Pa e motibu aki i esun ariba menshoná, frakshon di MFK a pidi presidente di parlamento djabièrnè último pa yama dos (2) reunion riba e siguiente temanan:

1. Parálisis-krísis ekonómiko ku Kòrsou ta den dje versus akuerdo di Gobernashon 2017-2021 “Realisando e Máksimo Potensial di Kòrsou di PAR-MAN-PIN”
2. Interkambio ku Gabinete Rhuggenaath riba protekshon di nos siudadano nan eksponé na produktonan kaduká i diferente otro iregularidat nan rondó di salú di nos abitantenan, ku awe ainda ta tumando lugá.

Atentamente,

Gerrit F. Schotte
Lider di MFK

===========================

Na: Presidente di Parlamento
sr. W. Millerson
Wilhelminaplein
Presente

Willemstad, 18 di ougùstùs 2017

Apresiabel sr. presidente,

Petishon reunion públiko konforme art. 64 ku punto di agènda: Interkambio ku Gabinete Rhuggenaath riba protekshon di nos siudadano nan eksponé na produktonan kaduká i diferente otro iregularidat nan rondo di salú di nos habitantenan, ku awe ahinda ta tumando luga.

Ta parse ku kontrolnan ku lo mester ta algu rutinario aña aden aña afo a destapá un abusu di marka mayó bou di nos komunidat. Entre otro nos frakshon a yama un reunion ku karakter di urgensha for di 22 di mei 2017 riba e tópiko preokupante aki.

Sinembargo mirando ku kontestanan di gobièrno den reunion di komishon sentral último no a kondusí na muchu klaridat di partí di gobièrno kiko nan lo hasi i ta hasiendo pa garantisá ku tur lokual nos komunidat kumpra den establesimentunan ku tin permit di gobièrno pa bende komestibel na habitantenan i tursistanan di Kòrsou ta produktonan bálido i sano, nos ta haña nos obliga di yama un reunion públiko.

Parlamento lo mester fiha su posishon riba artikulonan di lèi eksistente aprobá dor di parlamento den nos leinan penal, ku ta wordu infringí pero sinembargo nada no ta sosode. Outoridat i monopolio pa pèrsiguí esun ku ta infringí – faya ku lèi ta na diskreshon di OM anto tur indikashon ta ku si salú di pueblo di Kòrsou ta na peliger òf no esaki no ta un prioridat pa nan.

Nos komo legisladonan responsabel pa e komunidat aki a konstatá ku tin definitivamente burakunan den nos lèi ku tin wòrdu tapa i otronan ku mester wòrdu mehora. Tambe tin artikulonan di lèi ku no opstante ku nan ta eksisití, e delitonan aki no ta wòrdu pèrsiguí den esaki mester bin kambio, no por ta asina ku konsientemente ta atentá kontra salú di nos komunidat anto no ta un prioridat di parti di hustisia pa kuida e indefenso di esaki.

Nos ta keda en espera di bo konvokashon,

Atentamente,

[pdf-embedder url=”https://kikoapasa.com/wp-content/uploads/Karta-petsihon-reunion-públiko-Parlamento-18-8-17-protekshon-di-pueblo-su-salú.pdf” title=”Karta petsihon reunion públiko Parlamento 18-8-17 protekshon di pueblo su salú”]

[pdf-embedder url=”https://kikoapasa.com/wp-content/uploads/Karta-petsihon-reunion-públiko-Parlamento-18-8-17-riba-aktual-parálisis-krisis-ekonomiko.pdf” title=”Karta petsihon reunion públiko Parlamento 18-8-17 riba aktual parálisis-krisis ekonomiko”]

%d bloggers like this: