Kumplimentu ku regla no ta hasi bo un hende íntegro …ta tema di konferensia tokante integridat dia 22 di sèptèmber

Kumplimentu ku regla no ta hasi bo un hende íntegro
…ta tema di konferensia tokante integridat dia 22 di sèptèmber

Willemstad, 21 di ougùstùs 2017 – E promé konferensia anual tokante integridat ta ser organisá pa Leading with Integrity Foundation dia 22 di sèptèmber próksimo na Sta, Barbara Resort. Tema di e konferensia aki ta “The Deregulation of Integrity”, loke ta nifiká ku durante e konferensia lo trata e tópiko di integridat for di un ángulo diferente, esta, integridat ku ta ser motivá pa un konvikshon interno, i no komo konsekuensia di kumplimentu ku regla.

Durante un rueda di prensa ku a tuma lugá djaluna 21 di ougùstùs, presidente di Leading with Integrity Foundation, Nelson Foendoe, a splika ku e fundashon su meta ta pa ekipá lidernan den nos komunidat pa nan por inspirá esnan rondó di nan pa biba un bida íntegro. P’e motibu akí durante e tres último añanan, e fundashon a bin ta duna diferente workshop i charla grátis na diferente kompania, organisashon ‘non-profit’, universidat, partido polítiko i tambe iglesia na Kòrsou, Boneiru i Sürnam.

Awor e siguiente inisiativa pa sigui ekipá i konsientisá nos lidernan tokante integridat, ta pa tene un konferensia di un dia pa trata e tema di integridat den mas profundidat. Lo trata entre otro e retonan ku esnan den liderasgo ta konfrontá diariamente relashoná ku integridat na trabou. Durante e konferensia lo tin presentashon di tres oradó. E keynote speaker ta Abdu Murray, kende ta un autor i abogado prosedente di Detroit, Michigan. E otro oradónan ta dos persona lokal, esta Sidney Genoveva, kende ta un trainer i coach sertifiká pa John Maxwell, i Nelson Foendoe, kende ta presidente di Leading with Integrity Foundation. Den e konferensia lo tin tambe un ‘panel discussion’ ku e tres oradónan, i además oportunidat pa e partisipantenan por interkambiá nan ideanan di un forma interaktivo.

E konferensia ta konta ku dos patrosinadó prinsipal, ku ta Curoil i Bureau Telecommunicatie, Post en Utiliteiten, i varios otro spònser mas. Orario di e konferensia lo ta di 8:30 mainta pa 4:30 atardi dia 22 di sèptèmber na Sta. Barbara Resort. Entrada ta kosta $95 pa persona, inkluyendo lunch, i karchi ta optenibel na Mensing’s Caminada, Bruna i Samsom Saliña & Sta. Maria. Pa mas informashon tokante e konferensia, por tuma kontakto ku Leading with Integrity Foundation via email na info@lwi-foundation.org, òf subi e website www.lwi-foundation.org òf bishitá nan Facebook page: Leading with Integrity.

%d bloggers like this: