Fundashon Nos Grandinan tokante “Luna pa Demostra Apresio i gratitut na nos Grandinan

Diskurso di Geselle Rosaria – Coffi, Presidente di FNG…

Pa gana tempu, medionan por hasi uso di e informashon ku tin den e relato aki:

Bonbini na inisio di luna di sèptèmber ku a bira “Luna pa Demostrá Apresio i Gratitut na nos Grandinan’

Na mesa nos tin Ministernan di Gabinete Rhuggenaath:
Sr. Eugene Rhuggenaath (“stima nos grandinan”) ta sufri kebrante di salú i a wòrdu representá komo persona i tata pa su yu muhé mayó srta. Sophia Rhuggenaath, sr. Hensley Koeiman (“respetá nos grandinan”), sra. Suzanne Camelia – Romer (“kuida nos grandinan”), sr. Kenneth Gijsbertha (“yuda nos grandinan”), sr. Armin Konket (“sostené nos grandinan”), sr. Quincy Girigorie (“brasa nos grandinan”), sr. Steven Martina (apresiá nos grandinan”), sra. Zita Jesus – Leito (“malkriá nos grandinan”) i sra. Marilyn Alcala – Wallé (“balorá nos grandinan”).

Gobièrnu di Kòrsou tei presente pa duna sosten na nos grandinan, pa motibu ku nos grandinan ta hopi importante pa pais Kòrsou i tambe mirando e hecho ku semper nos grandinan a boga pa union i tur Minister ta haña esaki importante pa mustra den union, manera nos grandinan ta boga p’e, ku nos grandinan ta importante.

E “Luna pa Demostrá Apresio i Gratitut na nos Grandinan” ta kuminsá promé di sèptèmber i ta kulminá riba Dia Internashonal di Hende Grandi ku ta promé di òktober, pues 30 dia largu pa pueblo den su totalidat demostrá apresio i gratitut na nos grandinan:

Fundashon Nos Grandinan i Gobiernu di Korsou ta hasi un apelashon na:
individualnan pa adoptá un grandi solitario ku ta biba den su kas òf den kas di kuido. Grandinan solitario meresé atenshon di nan famia i tambe di individualnan ku tin e sintimentu di konbibensha;
forma grupo i hasi algu pa un grandi, p.e. bai chapi kurá, fèrf, organisá algu leuk pa nos grandinan;
famianan pa duna atenshon firme na bo grandi(nan) na kas òf den kas di kuido;
krèshnan, opvangnan i skolnan pa bishitá kasnan di kuido, hasi proyektonan ku nos grandinan òf invitá nan komo ex alumno/famia di alumno na skol;
Misanan pa tene nan sirbishi rekorando nos grandinan den kada predikashi;
empresanan pa hasi algu pa nan èks empleadonan penshonado of organisá algu great pa mayornan di nan empleadonan òf manda yama nan penshonadonan pa empleadonan aktual sera konosí ku nan i interkambiá kon e empresa a evolushoná kronológikamente;
barionan pa duna rekonosementu na e personanan mas grandi den nan bario;
service clubsnan, organisashonnan, grupo di grandinan i asosashonnan di penshonadonan organisá proyektonan òf plania pa bai keiru;
medionan di komunikashon por bende spòt pa empresanan trese dilanti mensahenan di konsientisashon ku ta regardá nos grandinan òf propagá produkto i/òf servisio pa nos grandinan, krea programanan pa entrevistá baluartenan i penshonadonan riba kualke tereno, entrevistá penshonado eksperto riba kualkier polémika ku ta notisia;
… i muchu mas, basta komunidat kompletu demostrá apresio i gratitut na nos grandinan.

Mester menshoná ku promé di oktober ta Dia Internashonal di Hende Grandi i Nashonnan Uní for di komienso di aña a bin ku e tema: “Stepping into the Future: Tapping the Talents, Contributions and Participation of Older Persons in Society.”

Danki na Gobièrnu pa ratifiká Dia di Wela i Tawela tur aña riba e di 2do djadumingu den sèptèmber ku lo mester bira un family day nashonal. E union familiar ta importante, fortifiká nos norma- i balornan/meta- i espektativanan i tambe traha riba stamboom familiar.

Tambe un danki pa duna 63 sentenario un dia nashonal. Sesent’i-tres sentenario pa un isla chikí ta hopi i nan lo sigui oumentá.

Bo mira rond, kada un Minister tin un mensahe. E mensahenan mas noble ta e gabinete Rhuggenaath ta kargé i ta simbolisá e atitut korekto ku mester tin pa nos grandinan. Esaki a bira e slogan pa Ministernan pa restu di nan bida. Kiko Fundashon Nos Grandinan ke men ku pa restu di nan bida?

Ta e team maravioso aki a pone e promé piedra pa nos grandinan i FNG, apesar ku nos no ta bevoegd ni no tin e bevoegdheid, tog nos a krea un byzondere landsbesluit ku nos a yama Nos Grandinan Landsbesluit i esaki ta enserá ku pa semper, e team aki nan nòmber lo keda resoná komo embahadornan di e mensahe ku a plak na nan pa semper.

Pues si un hende por ehèmpel bisa ku e ta kuida su grandi bon, outomátikamente ta kòrda riba sra. Suzy Camelia – Römer, si tende p.e. e tin hopi apresio pa e grandi ei, ta korda outomátikamente riba sr. Martina, etc.

Promé ku terminá, Fundashon Nos Grandinan ta yama danki na fundadornan di FNG ku ta sr. Edsel “Papy” Jesurun di kasi 87 aña i sr. Gilberto Coffi di kasi 81 aña ku despues di 14 aña ta bai baha i habri kaminda pa un team kompletamente hoben pa karga ku nos grandinan. E bon notisia ta ku ámbos ta keda fungi komo konsehero general pa e team nobo di FNG. Pues FNG tin 2 tanki di konsehero pa sigui guia FNG.

Gobièrnu di Kòrsou i FNG ke rekòrdá pueblo ku luna di sèptèmber tambe ta Luna di Medio Ambiente—involukrá grandinan pa move den bario i aportá na limpiesa. Moveshon ta bon pa mantené kondishon físiko. Pa fin di luna tin siman di Kulturismo, pues kultura i turismo a join ku otro.

Pueblo di Kòrsou, sèptèmber tin 30 dia largu pa yama grandinan pabien, pa brasa nos grandinan, pa sostené nos grandinan, pa yuda nos grandinan, pa kuida nos grandinan, pa apresiá nos grandinan, pa respetá nos grandinan, pa balorá nos grandinan, pa malkriá nos grandinan i pa stima nos grandinan

Gobièrnu di Kòrsou i Fundashon Nos Grandinan a duna rekonosementu na e Nèstor di medio di komunikashon ku ta sr. Eitel Hernandez, tambe pareha Nyria i Wim Tweeboom – Frans a haña un token di apresio pa nan aseptashon pa bira kara di “Luna pa Demostrá Apresio i Gratitut na nos Grandinan”, sr. Terrence Smith tambe a haña un token di apresio komo direktor di Huize Zuster G. M. Sproest ku a habri nan portanan pa e promé rueda di prensa pa inisiá “Luna pa Demostrá Apresio i Gratitut pa nos Grandinan i finalmente tur Minister tambe a wòrdu sorprendé ku un token di apresio komo e team ku a sòru pa pone e promé piedra pa nos grandinan.

Nos Grandinan, pabien ku Boso luna!

%d bloggers like this: