ANOCHI INFORMATIVO TOKANTE PROSESO PA ATKERÍ PASPORT A BASE DI PATERNIDAT HULANDES.

ANOCHI INFORMATIVO TOKANTE PROSESO PA ATKERÍ PASPORT A BASE DI PATERNIDAT HULANDES.

Willemstad – Servisio pa Asuntunan Públiko (Kranshi) ta organisá un anochi informatívo pa duna informashon tokante e proseso pa yega na un pasport. Esaki lo tuma lugá djaweps 24 di ougùstùs awor, 7 or di anochi na Misa La Birgen di Altagracia, Steenrijk (den e sentro di bario). E anochi informativo aki ta un inisiativa di Ministerio di Maneho di Gobernashon, Planifikashon i Servisio Públiko en koperashon ku Servisio di Atmishon (Ministerio di Hustisia) i Konsulado di Repúblika Dominikana. Tur persona di orígen Dominikano, espesialmente esnan ku a haña pasport Hulandes promé ku 1 di aprel 2003 a base di ta yu di un tata ku nashonalidat Hulandes ta keda kordialmente invitá.

Asuntunan di nashonalidat ta un responsabilidat ku Statüt ta enkargá Reino kune. Servisio pa Asuntunan Públiko ta e outoridat lokal ku na nòmber di Reino ta otorgá pasport Hulandes. Tambe e servisio na nòmber di Reino ta revisá tur kaso di personanan ku, promé ku 1 di aprel 2003, dor di rekonosementu (Paternidat) a atkerí e nashonalidat Hulandes. Promé ku otorgá un pasport Hulandes, Servisio pa Asuntunan Públiko mester di e dokumentonan nesesario di e pais di orígen di e persona en kuestion pa por verifiká su identidat i nashonalidat. Den kuadro e aki Servisio pa Asuntunan Públiko ta duna informashon i guia na su klientenan.

Pa por duna mihó informashon i servisio, tambe na klientenan di origen Dominikano, Servisio pa Asuntunan Públiko a aserká departamento di Atmishon i e Konsulado di Repúblika Dominikana pa huntu organisá un anochi informatívo tokante e tema aki i hasi un invitashon na e kolonia Dominikano pa ta presente.
Nos ke duna e informashon p’asina huntu den union nos kanalisá e proseso ku alabes ta hasi e diferensha den kalidat di servisio ku Servisio pa Asuntunan Públiko, huntu ku Servisio di Atmishon i e Konsulado di Repúblika Dominikana ta brinda na e kolonia di Repúblika Dominikana i komunidat en general.

%d bloggers like this: