Advertisements

Mas trabou na viadukt Arubastraat den Otrobanda

Mas trabou na viadukt Arubastraat den Otrobanda

Willemstad – Obra Públiko ta alertá ku den e fin di siman di 19 i 20 di ougùstùs próksimo tin trabounan nesesario, na viadùkt A.A. de Lannoy- Willems Boulevard for di Arubastraat bai Koningin Julianabrug direkshon di Punda. E trabounan ta enserá ku outomobilistanan lamentablemente mester tuma un ruta adaptá. Durante di e wikènt aki, e kaminda bou di e viadùkt menshoná ta será pa tráfiko entre 8’or di mainta i 5’or di atardi.

Pa por yega na nan destinashon, tráfiko ku ke bai den e direkshon di Punda i ku normal ta pasa bou di e viadùkt di Arubastraat, mester sigui e diferente bòrchinan ku ta duna un guia na kon pa kore. Pa bai direkshon di Punda biniendo for di Saliña, na lugá di kita for di brùg pa baha bai na Otrobanda, mester sigui bai e lusnan di tráfiko na Seru Dòmi i hasi un ‘u-turn’ pa bai bèk i kita for di e kaminda pa por drenta Otrobanda.

Mientrastantu ta sigui tambe ku e trabounan intensivo na e diferente otro viaduktonan di Kòrsou kaminda tin bastante forma di daño , entre otro na e betòn, na e heru den e betòn i na e balustradanan banda di e viaduktonan. E trabounan ta andando pa algun tempu kaba den fase. E ta tuma tempu pa motibu ku ta trata di un renobashon struktural i duradero.

Kontratista Betonbouw NV, Obra Públiko i polis tékniko ta pidi públiko pa tene kuenta ku e trabounan i adaptá nan ruta durante di e trabounan di mantenshon. Ora no ta nesesario pa sera e kaminda kompletu, ta habri sikiera un via. Ta pidi outomobilistanan pa tene kuenta ku personal i material di renobashon ora ta trafiká den besindario di e viadùkt.

Advertisements
%d bloggers like this: