Advertisements

Prioridat number 1 ta bibienda pa pueblo Minister Zita Jesus-Leito ta redusí listanan di petishon na Domeinbeheer i FKP

Prioridat number 1 ta bibienda pa pueblo
Minister Zita Jesus-Leito ta redusí listanan di petishon na Domeinbeheer i FKP

Willemstad – Minister di Tráfiko, Transporte i Planifikashon Urbano, señora Zita Jesus-Leito, ta kontinuá ku su enfoke riba bibienda: “E Grupo di Trabou ku ta konsistí di servisionan ROP, Domeinbeheer i Openbare Werken i fundashonnan FKP i Kadaster ta traha huntu pa redusí listanan di petishon i retraso den servisio. Ehersisionan ku a hasi a resultá den redukshon di lista pa tereno na Domeinbeheer ku 2.517, pues di 5.013 pa 2.496 petishon. Na FKP a redusí e lista di petishon ku 1.694, pues di 8.400 pa 6.706 petishon. Esaki ta duna nos un mihó bista di e kantidat real di hende ku ta den espera di un tereno i di un kas. Awor nos por fiha prioridat i traha mas dirigí pa yega na solushon di e problema di eskases di tereno i kas”, asina e minister a deklará den un konferensha di prensa.

Seis siman pasá e minister a presentá su Grupo di Trabou i a splika ku e ke mas sinkronisashon entre su servisio i fundashonnan, pa hasi posibel ku pueblo por yega mas fásil na tereno, kas i pèrmit. E promé meta tabata redusí e listanan di petishon. Pa por yega na un tereno di Domeinbeheer òf un kas di FKP, mester kumpli ku algun rekerimentu: mester tin mas ku 18 aña di edat, ta inskribí na Kòrsou i no tin kas propio òf tereno. Tambe mester por tin forsa finansiero pa konstruí un kas riba tereno di Domeinbeheer òf paga hür den kaso di FKP. Tantu Domeinbeheer komo FKP a traha konhuntamente ku Kadaster i Kranshi pa baha tur hende for di lista ku ya no ta inskribí mas na Kranshi pasobra e persona a bai biba na otro pais òf a fayesé, òf hendenan ku mientrastantu a bira doño di un otro tereno.

Den sèptèmber tur hende ku Domeinbeheer i FKP a baha for di nan lista di petishon lo risibí un karta na e adrès ku e instansianan tin di esun ku a hasi petishon. Tambe lo pone aviso den korant ku a saka e kartanan. Den kaso ku un persona no ta di akuerdo ku eliminashon di su petishon, e por entregá un keho por eskrito denter di un periodo di 6 siman despues di e fecha di e karta. Keho ta posibel solamente por eskrito.

Reto
E minister a deklará enfátikamente: “Mi prioridat number 1 ta bibienda pa pueblo. E meta prinsipal p’esei ta pa Gobièrnu saka mas tereno i konstruí mas kas pagabel i den forma aselerá. Nos ta traha pa realisá esei, apesar di tur nos limitashonnan . Ta p’esei mes mi a duna e Grupo di Trabou e siguiente retonan. Pa fin di 2017 Domeinbeheer mester tin 250 kavel disponibel pa otorgá na personanan riba e lista di petishon. Ke men den e delaster 4 lunanan di e aña aki mi ke pa e lista di petishon aktual baha ku 10%. Pa fin di 2017 FKP mester kuminsá hasi trámite pa traha kas di 80.000 pa 100.000 florin. Análisis ta mustra ku ta den e kategoria aki tin mas nesesidat pa kas.” E minister a indiká ku e ta bin raportá bèk denter di dos luna kon kosnan ta kanando pa logra e reto aki.

Progreso
Entre seis siman pasá ku minister a presentá su Grupo di Trabou i awor, tabatin vários progreso.
Ounke ROP ta traha ku solamente 10% di e kapasidat ku ántes e tabata disponé di dje den e departamentu ku ta otorgá pèrmit di konstrukshon, tòg e servisio a produsí 151 pèrmit: 81 pa bibienda, 18 pa un kantidat total di 114 apartamento i 52 den kuadro di proyektonan grandi i pa ofisina. Un kuart di e pèrmitnan aki ta trata di petishonnan ku tin retraso, trahando a base di e “Inhaalslag Wegwerken Achterstallige Bouwaanvragen (proyekto IWB)”.

Den e último simannan un tim spesial di Domeinbeheer a atendé i finalisá 112 petishon pa diferente di su servisionan, manera renobá kòntrakt pa tereno di èrfpagt (wederuitgifte), kambia hür den èrfpagt, traspaso di hür i splet tereno di èrfpagt. Di e otro banda, un otro tim ta traha riba gran parti di e petishonnan di 2017, pa evitá ku ta krea retraso nobo. Den e próksimo lunanan FKP lo finalisá kas spesial pa adulto mayó i kas regular na Montaña, i tambe otro kasnan na Sapaté i Barber.

Fin di Komunikado

Advertisements
%d bloggers like this: