MINISTER RHUGGENAATH TA REKONOSÉ E BALOR AGREGÁ DI GREENTOWN

MINISTER RHUGGENAATH TA REKONOSÉ E BALOR AGREGÁ DI GREENTOWN

Willemstad – Djabièrnè 11 di ougùstùs último e miembronan di direktiva Fundashon GreenTown Kòrsou tabata invitado di Minister Presidènt Eugene Rhugenaath. Minister Presidènt Rhuggenaath a ekspresá algun tempu pasá públikamente ku e ta kere ku ta bon pa un organisashon manera GreenTown haña un ròl aktivo den e proseso di desaroyo duradero di Kòrsou i spesífikamente e área di Schottegat. Na final di e enkuentro Minister Presidènt a palabrá ku direktiva di Fundashon GreenTown ku lo bai deliberá interno riba e posibilidatnan pa un kolaborashon ku GreenTown. Aki un par di siman lo bolbe reuní pa duna kontenido konkreto na e kolaborashon aki.
Durante e enkuentro tabata presente Minister Presidènt Eugene Rhuggenaath i kolaborador señor Gunnar Louisa, miembronan di direktiva di Fundashon GreenTown, Presidente señor Ron Pin, Tesorero señor Harm Rooijakkers, Sekretario señor Sinuhe Oomen i miembro di direktiva señora Bianca Neman. Miembronan di direktiva señor Sven Rusticus i señor Orlando Meulens no tabata presente.
GreenTown a inisiá algun aña pasá ku e proseso pa analisá e alternativa den kaso ku no kontinuá ku refineria na aña 2019. Ku sosten di ekspertonan lokal i internashonal a bishitá i entrevistá empresa i habitantenan den e área. E análisis aki a resultá den un rapòrt ku ta brinda perspektiva pa Kòrsou i ta primintí di krea hopi mas kupo di trabou i mas entrada kompará ku e situashon aktual. Den transkurso di tempu Fundashon GreenTown a amplia su konosementu den limpiesa di terenonan kontaminá i transformashon di e asina yamá ‘Brownfield’ pa ‘Greenfield’). Alabes GreenTown a krea un netwerk internashonal ku kompanianan spesialisá i ekspertonan den e.o. konstrukshon i desaroyo duradero di área i siudatnan netamente manera esun di Schottegat. Fundashon GreenTown no tin e meta pa desaroyá pero ke fasilitá i sostené Gobièrnu di Kòrsou pa yega na e eskohonan korekto. Tur esaki den benefisio di tur partner embolbí i spesialmente komunidat di Kòrsou.
Minister Presidènt a splika ku Gobièrnu di Kòrsou a skohe pa kontinuá ku Refineria i lo sigui kana e trayekto aki. Alabes Minister Presidènt Rhuggenaath ta kere ku mester analisá tambe tur posibilidat pa asina ta bon prepará pa kualke senario ku por presentá. E último aki tambe tabata e desishon di e gobièrnu di e tempu ei. E minister ta kere tambe den inklushon i diálogo. Despues ku e Minister Presidènt a tuma nota di tur e trabounan ku Fundashon GreenTown a hasi kaba pero tambe e ekspertisio ku nan tin den kas i e netwerk ku a krea, ta konvensí ku e Fundashon tin un balor agregá i por kontribuí debidamente. Segun Minister Presidènt Rhuggenaath ta importante pa traha huntu komo partner pa yega na e mihó senario pa Kòrsou i krea mas posibilidat pa nos mes hendenan.

Potrèt: di man robes pa man drechi Tesorero di Fundashon GreenTown señor Harm Rooijakkers, sigui pa miembro di direktiva señora Bianca Neman, Minister Presidènt Eugene Rhuggaath, Presidente di Fundashon GreenTown señor Ron Pin i Tesorero señor Sinuhe Oomen. Riba pasfoto miembronan di direktiva señornan Sven Rusticus i Orlando Meulens.

17 di ougùstùs 2017

%d bloggers like this: