Minister Koeiman ta bishitá klousura di programa di fakansi di Sentro di Bario Seru Papaya

Minister Koeiman ta bishitá klousura di programa di fakansi di Sentro di Bario Seru Papaya

WILLEMSTAD – Riba invitashon di direktiva di Sentro di Bario Seru Papaya, Minister Hensley Koeiman ta bishitá e aktividatnan di klousura di e plan di fakansi di ‘Sentro’.
Minister Koeiman a eskpresá palabranan di eleogio pa e bon trabou ku e direktiva i otro boluntarionan ta hasi riba un base kontonuo pa mehorá kalidat di bida pa abitantenan di e bario di Seru Papaya. Alabes e titular di enkargá ku Desaroyo Sosial, Labor i Bienestar a dirigí palabranan di motivashon pa e hóbennan ku a partisipá na e Plan di Fakansi. “Enfoke di e plan di fakansi tabata formashon general di e hóbenannan”, miembronan di direktiva a informá. “Temanan manera konsientisashon riba kon por reusá produktona ku normal ta tira afó, pero tambe norma i balor ta temanan ku nos dediká atenshon na dje. Tambe nos a trese nutrishonista pa konsientisá e muchanan riba importansia di kome kome salú i den sierto kaso a hasi uso di un sikólogo pa a yuda lidernan di e ‘sentro’ riba e tereno aki di spesialisashon.”

Un otro aspekto sigur importante pa menshoná ta ku Fundashon Shimaruku, huntu ku boluntarionan, a perkurá pa kuminda kayente pa e muchanan ku a suma un total di algu as ku setenta. Fundashon Shimaruku a bin ta perkurá ya pa años pa mas ku 100 mucha di e bario por haña kuminda kayente tur mèrdia promé ku nan kuminsá ku nan tareanan di skol na e sentro di bario. No ta normal ku ta hasi esaki den e luna di fakansi grandi tambe, pero e aña aki pa promé biaha a hasié tambe den e plan di fakansi.

Mas aleu por informá ku artistanan Robert Meeuw i Garrick Marchena a buska produkto ku a deshasí di nan di un forma iresponsabel den laman, na kostanan di Kòrsou, pa traha figuranan di bestia di laman, pa dekorá e murayanan di e sentro. E obranan artítiko ta sirbi alabes komo obhetonan ku e muchanan ta usa pa hasi zonido i ritmo musikal en konhunto kuné. Un totalidat di aktvidat ku e lidernan i e hóbennan ta hopi orguyoso di dje, pero tambe e bario i komunidat di Kòrsou.

%d bloggers like this: