Advertisements

Minister Koeiman invitado spesial na reunion di konsulta di BONECO

Minister Koeiman invitado spesial na reunion di konsulta di BONECO

WILLEMSTAD – Djaweps 17 di ougùstùs, riba dia di konmemorashon di e lucha di Tula, Bazjan Karpata, Luis Mercier i senterares di esklavo, pa trato hustu na trabou, BONECO a tene un reunion di konsulta ku representantenan di organisashonnan representá serka e sindikato. Invitado spesial pa e enkuentro tabata minister Hensley Koeiman. Sr. Erwin Koenze, presidente di BONECO, a informá e miembronan presente ku algun siman pasá direktiva di BONECO tabatin un reunion ku e titular enkargá ku kartera di Desaroyo Sosial, Labor i Bienestar. Sr. Koenze a bisa ku tabata un reunion basta fuerte, pero ku al final e sindikato a sali hopi satisfecho pa e echo ku Minister Koeiman tabatin oido pa prekupashonnan di e sindikato i ku Minister Koeiman a primintí di ku kanando un trayekto huntu ku e sindikato, lo bai hasi tur loke ta na alkanse pa bienestar di e trahadó.
Minister Koeiman a dirigí su mes na un sala grandi di reunion kompletamente yen. Minister Koeiman a informá di su vishon i maneho riba tereno laboral, di desaroyo sosial i bienestar. Mas aleu el a kontestá preguntanan for di sala riba prekupashonnan manera entre otro sueldo mínimo, e forma di operá di uitzendbureau’s, kontròlnan riba seguridat i kumplimentu di leinan di labor etc.

Sr. Koenze na su turno, ku hopi orguyo, a bisa ku BONECO ta na víspera di selebrá su di 48 aniversario i ku resien e sindikato tin ofisina i espasio pa traha na e edifisio di ABVO na Brievengat. Ku ainda mas satisfakshon sr. Koenze a informá ku e dos sindikatonan a firma un akuerdo di kolaborashon/koperashon pa traha huntu.

Advertisements
%d bloggers like this: