Kòrsou no ta i hamas lo ta riba lista di siudatnan mas peligroso na mundu

Kòrsou no ta i hamas lo ta riba lista di siudatnan mas peligroso na mundu

Resientemente un persona a ekspresá su mes riba un medio sosial kaminda e ta indiká ku si situashon di krímen na Kòrsou no baha, denter di poko Kòrsou lo resultá riba e lista di 75 siudatnan mas peligroso na mundu. Ademas di esaki e ta ekspresá su persepshon ku e Minister di Hustisia aktual, señor Quincy Girigorie no ta hasiendo sufisiente pa baha kriminalidat na Kòrsou. Pa evitá ku e ekspreshonnan aki ta krea pániko i konfushon serka e pueblo, Minister di Hustisia Quincy Girigorie, ta refutá e ponensia en kuantu aparishon riba un lista di siudatnan mas peligroso na mundu kategórikamente.

Instansianan ku ta midi sentido di seguridat den un siudat pa por pone esaki riba e lista indiká, ta atendé solamente ku siudatnan ku tin mas ku 300.000 habitante ya ku e método ku nan ta usa no ta aplikabel riba siudatnan ku ménos habitante.
Si hasi esaki, e método lo duna un bista inkorekto di e realidat di e pais. Un ehèmpel simpel ta, ku si durante un aña tuma lugá kuater asesinato riba un isla ku tin 2000 habitante, esei lo nifiká ku e isla lo subi e tòp 10 di ’siudatnan’ mas peligroso na mundu inmediatamente. E faktornan ku un siudat òf pais di ménos ku 300.000 habitante ta tene kuenta kuné pa determiná e sentido di seguridat pues, ta diferente. Komo tal, ta imposibel pa Kòrsou aparesé riba kualke lista internashonal di siudatnan mas peligroso na mundu.

Maneho basá riba faktornan kriminogeniko
Minister Girigorie sinembargo ta rekonosé ku e situashon di kriminalidat ku Kòrsou ta pasando aden e último dékada ta sumamente preokupante. Den su maneho e ta basa su mes riba estudionan sientífiko rekonosí riba kriminalidat i e orígen di aktitut kriminal. Den e kuadro aki ta importante pa para ketu na kua ta e faktornan di riesgo pa spesialmente un hóben ku ta drenta den kontakto ku krímen, e asina yama ’criminogene faktoren’ (faktornan kriminogéniko). Estudionan rònt mundu ta demostrá ku e faktornan di riesgo ku mas por hiba un hóben pa skohe pa kriminalidat ta entre otro: uso di droga òf alkohòl, falta di edukashon eskolar (“dropout”) i/òf falta di trabou, falta di bibienda adekuá, falta di entrada i mal atendementu ku sèn, relashonnan familiar instabil, falta di abilidat pa yena tempu liber i salú mental defisiente

Prevenshon i resosialishon
E titular di Hustisia ta enfatisá ku e úniko método efektivo pa frena i baha kriminalidat na Kòrsou a largu plaso ta, un maneho inter-ministerial integral, basá riba formashon di nos hóbennan. Esaki ku e meta pa minimalisá e faktornan kriminogéniko ku ta influensiá e komportashon di hóbennan den nos komunidat i asina yega na komportashon produktivo serka e grupo aki. Komo tal, den e kuadro aki e maneho hudisial di e próksimo kuater añanan aparte di e pilá di represhon, ta ankrá riba e otro dos pilánan sumamentu importante ku ta prevenshon i resosialisashon.

Laga nos tur ban duna un man
Ta lógiko ku ta reina preokupashon pa e situashon aktual di kriminalidat den nos pais. Awor mas ku nunka ta e momentu pa den tur gremio nos dediká mas atenshon na edukashon di nos hóbennan, pa evitá ku nan ta komete aktonan kriminal. Minister di Hustisia lo hasi lo máksimo huntu ku tur sektor den e kadena hudisial pa kombatí kriminalidat i a la bes ta hasi un yamada, na kada siudadano (preokupá) pa e tambe kontribuí manera e por, pa kombatí krímen den nos sosiedat. Pronto e Minister lo presentá su plan di maneho ku puntonan konkreto kon pa frena i baha e ola di kriminalidat ku ta asotando nos pais.

%d bloggers like this: