Advertisements

Booshi Wever, candidto #1 lista PPA/UPP: UPP lo no permiti pa e ambtenaar bira e “scape-goat” pa motibo di maneho financiero malo y deficiente di gobierno di AVP

Booshi Wever, candidto #1 lista PPA/UPP:
UPP lo no permiti pa e ambtenaar bira e “scape-goat” pa motibo di maneho financiero malo y deficiente di gobierno di AVP.

Nos situacion financiero actual ta un desaster y e debe nacional ta sigui subi t’e pasa dak. Nos debe ta na 86% di nos GDP y ta calcula cu esaki lo yega un percentahe astronomico di 126% ora cu nos mester cuminsa paga e PPP proyectonan. Raad van Avies, IMF y CAft ta recomenda pa gobierno tuma medidanan pa evita un derumbe total di nos finanzas publico. Entre otro a recomenda pa privatisa AZV y reduci e cantidad di empleadonan publico.
E cuerpo di empleadonan publico na Aruba ta halto, particularmente si nos compara esaki cu nos hermana isla Corsou. Tur gobierno a para keto na e problema aki y na diferente ocasion a laga traha un “kerntakenanalyse”, cu asina leu cu mi sa nunca a wordo ehecuta. E motibo principal pa no ehecuta esaki ta, cu reduccion di e cuerpo di empleadonan publico lo wordo ricibi pa un resistencia masal door di e propio ambtenaarnan, y cu na su turno esaki por costa un partido e eleccion. Tambe dor di no ehecuta esaki, e gobernante mes por sigui haci su mes culpabel na politica di patronahe y cumpli asina cu su “friends and family” door di ofrece nan un puesto como ambtenaar. Aki mi mester hinca man den “eigen boezem”! Pero esaki simpelmente no por continua.

Pa motibo di e wowo critico di gobierno di Reino riba funcionamento di nos gobierno actual cu ta sostene e “conseho” di CAft pa reduci e aparato gubernamental, e gobierno a hay’e obliga pa bira creativo. Na prome lugar a amplia e cantidad di departamentonan di gobierno di sesenta y pico pa mas di 120. Tambe e gobierno a bira sumamente creativo den nombracion di trahador no como ambtenaar, pero como contractant. Y di otro banda gobierno, pa tapa wowo di Hulanda, ta ehecutando su di tantisimo areglo di VUT.
E siguiente gobierno lo bay hay’e cu un dilema grandi. Sea ta cumpli cu e deseo di Hulanda y ta reduci e cantidad di empleadonan publico y di e forma ey core e riesgo di confrontacion cu e sindicatonan. Of sea ta sera wowo pa e realidad y sigui e mesun modus operandi di e gobierno actual, loke ta nifica keda mantene tur e departamentonan y contractant.
UPP ta di opinion cu no por laga e ambtenaar ta esun cu mester wordo sacrifica pa e maneho defectuoso cu a wordo ehecuta e ultimo añanan. Pesey lo no bay over na kita ningun ambtenaar for di trabou, cu na e momentonan aki ta den organisacion gubernamental regular. E ambtenaar ta contribui na e caha di gobierno y e empleado publico ta gasta su placa aki na Aruba mes. Encaso mes si yega na despidi un cantidad grandi di ambtenaar, anto e pregunta cu ta surgi ta unda nan lo bay ubica e trahadornan aki cu un trabou decente y cu lo bay paga mas cu e minimumloon? Actualmente entre 65 pa 70% di trahadornan den sector priva tin minimumloon. Si e ambtenaar tin e suerte di haya trabou den sector priva, e lo bay atras den salario loke nifica menos entrada pa e caha di gobierno, menos poder di compra y menos entrada pa nos economia cu nos tur sa cu ta stagna y ta confrontando retonan grandi.

UPP lo atende cu e problema di e gasto halto di e cuerpo di ambtenaar di otro manera. Na prome luga lo bay laga evalua e funcionamento di e departamentonan atraves di un kerntaken analyse. Mester haya un bista cuanto departamento tin y cuanto a bin acerca den e ultimo añanan y kico ta nan balor agrega pa e pais. Mester evalua e cantidad di contractnan cu a ser cera e ultimo añanan (vooral e ultimo simannan) y si esaki nan tabata necesario pa funcionamento di gobierno. Importante ta pa sa cuanto personal cu a wordo nombra tabata kader y cuanto tabata nombracionnan politico. Lo evalua tambe con eficiente y efectivo e departamentonan ta traha y con grandi e necesidad ta pa “kaderpersoneel”. Bahamento di e cantidad di empleadonan publico lo mester bay gradualmente y esaki lo mester bai segun e asina yama “natuurlijke afvloeiing” , VUT of otro motibo. Pesey UPP no lo despidi ningun ambtenaar di un forma obligatorio.

Un condicion indispensabel pa realisa un reorganisacion adecuado y imparcial di e cuerpo di ambtenaar, MESTER cuminsa cu introducion den parlamento di un ley formal pa reglamenta esaki. E “Landsverordening” lo rekeri un mayoria di 2/3 parti di parlamento cu a base di un “kerntakenanalyse” lo determina cuanto departamento of servicio ta necesario y cuanto empleado cada departamento of servicio mester tin pa por duna e servicio optimal na e pueblo Arubano. Y si acaso cu mester bin un departamento of servicio nobo y/of mas empleado, esaki mester bai via un cambio di e ley ariba menciona. Esaki ta un ley cu pa hopi aña ta vigente na Corsou caba.
E otro aspecto cu nos ta para p’e ta cu mester depolitisa nombramento y promocion. Obviamente cu tur cambio y/of adaptacion lo mester sosode conforme reglanan estricto di Good Governance. Mientras cu mester prepara e ambtenaar manera debe ser, pa cumpli su trabou y servicio na pueblo.
Mester stop di haci e ambtenaar e “scape goat” di nos problema financiero, pero di otro banda mester yega na un acuerdo si cu e aparato gubernamental mester por brinda un mihor servicio na nos pueblo. Un aparato gubernamental cu ta consisti di hendenan capacita cu e empeño pa ofrece nan maximo esfuerso pa yuda recobra nos autonomia financiero.
Esaki ta algo cu e combinacion PPA/UPP sigur ta ofrece nos pueblo!

Lider di UPP
Candidato #1 Lista Combina PPA/UPP
C.A.S.D. Wever
17 augustus 2017

Advertisements
%d bloggers like this: