Advertisements

​PLENCHI NA ORANJESRTAAT A WÒRDU LIMPIA UN BIAHA MAS 

PLENCHI NA ORANJESRTAAT A WÒRDU LIMPIA UN BIAHA MAS 

Fundashon Kòrsou Limpi i Bunita (FKLB) a tuma nota ku habitantenan mes ta perkurá pa situashonnan a-higiéniko surgi den nan bario. 

Na momentu ku no deshasí di e shushi akí di forma responsabel i bai benta esaki riba un plenchi òf área alehá den bario esaki ta e komienso di un kadena di shushamentu. Shushi ta hala shushi i e konsekuensia di e akto akí ta ku mas persona di e bario mes òf di otro bario ta sigui e komportashon robes di hasi nan mes kulpabel na tiramentu di shushi ilegal.

Den luna di yüli e tim di Selikor NV a limpia e plenchi na Oranjestraat, pues por tuma nota ku un biaha mas e tim a perkurá pa hasi e sitio ilegal di deshasí shushi akí limpi. A rekohé un total di 20.310 kilo di shushi i durante di e trabou a konstatá diferente tipo di shushi ku klaramente ta mustra ku ta habitantenan di e bario mes ta hasi nan mes kulpabel na e echo kastigabel akí. 

Lamentablemente nos habitantenan mes no ta realisá ku e aktitut robes akí ta krea un bisti mahós riba e karetera prinsipal ku ta kondusí pa nos sentro di suidat i dje forma akí ta krea un menasa pa salubridat públiko dor di molèster di holó desagradabel, foko di djaka, ratón i insekto.

FKLB ke hasi un apelashon na e habitantenan di Oranjestraat i bisindario pa yuda kontrolá i tira bista riba esnan ku no ta kumpli ku reglanan di higiena i limpiesa. Laga kada un di nos yuda frena e tiramentu di shushi ilegal i kontribuí na un bario limpi. Deshasí di bo shushi di un forma korekto i responsabel, asina nos tur por disfrutá di un bario limpi i finalmente un Kòrsou liber di shushedat.

Advertisements
%d bloggers like this: