Presidente di Parlamento sr. William Millerson a risibí un delegashon di maestro i studiantenan di Inter Continental University of the Caribbean

Awe djarason mainta dia 16 di ougùstùs 2017, Presidente di Parlamento sr. William Millerson a risibí un delegashon di maestro i studiantenan di Inter Continental University of the Caribbean ( ICUC) situá den Otrobanda den e sala di reunion plenario di Parlamento. E bishita aki ta den kuadro di nan siman di orientashon formativo- edukativo awó ku nan a kuminsá nan formashon akadémiko na ICUC. E studiantenan a haña informashon kiko Parlamento ta, kon e organisashon ta funshoná i su importansia pa demokrasia di nos pais.

Presidente di Parlamento sr. Millerson a guia un debate, aplikando tur e reglanan vigente di e reglamentu di òrdu di Parlamento. Un momentu speshal tabata na momentu ku un hóben studiante oriendo di Haiti a pidi palabra i a hiba parti di su diskurso na Franses. Aparte di esei e miembronan di Parlamento sra. visepresidente Giselle Mc. William i lider di e frakshon di MAN den Parlamento sra. Elsa Rozendal a interkambiá di idea den un ambiente ameno riba vários tópiko ku e hóben studiantenan. Parlamento di Kòrsou ta deseá e studiante tur klase di éksito ku nan kurso akadémiko di e aña aki.

%d bloggers like this: