Advertisements

‘Stemwijzer’ VotaAruba ta den aire desde awe

‘Stemwijzer’ VotaAruba ta den aire desde awe

ORANJESTAD – Fundacion Fuente ta presenta VotaAruba: un herment informativo pa asisti pueblo di Aruba den su orientacion politico pa e eleccion binidero cu ta tuma lugar riba 22 di september 2017. Riba www.VotaAruba.org bo por compara bo opinion cu esun di cada partido politico a base di 30 ponencia.

Desde diamars 15 di Augustus, for di 8’or di mainta, pueblo por haci uzo di e ‘StemWijzer’ di VotaAruba. E redaccion di VotaAruba a puntra tur partidonan politico pa contesta 30 ponencia tocante topiconan importante pa nos isla. Pueblo di Aruba por bishita VotaAruba.org, contesta e mesun 30 ponencianan aki y VotaAruba ta lagabo compara bo opinion cu e contestanan di e partidonan. Asina abo por mira cu cua partido abo tin mas en comun. Na final VotaAruba ta genera e top 3 partidonan cu mas ta cuadra cu e contestanan di e usario.

E partidonan cu a responde e yamada pa participacion den e VotaAruba ta AVP, MEP, POR, ReD, UPP, CURPA y Raiz. Fuente ta gradici e partidonan aki pa nan sosten den e desaroyo di e herment informativo aki. E mete di VotaAruba ta pa contribui na e calidad di e proceso democratico na Aruba.

Metodo
‘VotaAruba’ ta implementa e metodo hulandes di StemWijzer, cual ta e prome guia electoral na mundo. E herment aki a ser desaroya door di ProDemos. ProDemos ta un fundacion independiente y imparcial cu ta basa na Hulanda y ta traha rond mundo cu e meta pa informa hende tocante e estado democratico.

VotaAruba no ta un poll of encuesta. Cu VotaAruba bo mes por compara y explora e opinionnan di tur partido. Pero tambe bo por explora bo resultadonan, y compara e diferente opinionnan y clarificacionnan di e partidonan. Abo mes por indica cua topico bo ta haya ‘extra importante’ y modifica bo respuestanan pa mira kico e consecuencia ta pa bo resultado.

E redaccion di VotaAruba a scohe topiconan cu ta haya hopi atencion den politica y campaña na e momentonan aki. Topiconan di enfoke ta inclui, entre otro, maneho di finansas publico, enseñansa y seguro medico. Un otro criterio importante pa seleccion di e lista ta e diversidad di contesta di partidonan: si hopi partido tin e mesun punto di bista tocante un topico, e ponencia aki ta menos interesante y menos util pa VotaAruba. E redaccion a aspira pa construi ponencia cu ta cla y obhetivo, y ta uza terminonan simpel.

Privacidad y anonimidad
VotaAruba ta pone bo privacidad na prome lugar. Fuente y ProDemos a tuma e medidanan tecnico y organisatorio adecua pa sigura e privasidad y anonimidad di e usuario. Ora bo cuminsa cu VotaAruba, e aplicacion ta wordo carga riba bo mes un aparato (manera bo computer, tablet of telefon). VotaAruba nunca lo mira e contestanan cu abo a yena den VotaAruba, ni bo resultado. Bo informacion no ta wordo warda den ningun database y lo no ta disponibel pa VotaAruba of ningun otro partido of persona na ningun manera.

VotaAruba a wordo desaroya door di Fuente (www.nosfuente.org), un grupo di hoben Arubiano cu ta traha y studia na Hulanda. Fuente ta un plataforma cu ta duna espacio pa comparti informacion tocante di Aruba, pa propone solucionnan y presenta ideanan. Fuente no ta afilia na ningun partido politico. E enfoke di Fuente ta e bienestar di nos isla.

Fuente ta un fundacion nonprofit. VotaAruba a wordo realisa cu e sosten financiero di empresanan local: Arubabank, Aviation Security Worldwide, De Palm Tours, Fantastic Gardens, Guardian Group, HBN Law, Inarch, Setar, y Papiamento Restaurant.

Otro partnernan cu a sostene Fuente den e initiativa aki: Den Cayente, ECA Communication Group, Wolff Independents, Kamer van Koophandel, Universidad di Aruba, y VotaConsciente.com.

Fuente ta invita un y tur pa bishita www.VotaAruba.org y comproba bo preferencia politico.

Pa mas informacion en general tocante VotaAruba bishita:
www.VotaAruba.org
Facebook: fb.com/votaaruba // Twitter: @VotaAruba

Fundacion Fuente
www.nosfuente.org
fb.com/nosfuente
info@nosfuente.org

Advertisements
%d bloggers like this: