Konmemorashon “DIA DI LUCHA PA LIBERTAT”

Konmemorashon “DIA DI LUCHA PA LIBERTAT”

Djaweps awor 17 di ougùstùs, ta konmemorá e echo ku 222 aña pasá a tuma lugá na Kòrsou e gran rebelion di katibu bou di liderato di Tula i su kompañeronan. Ta e fecha ku Gobièrnu di Kòrsou a proklamá na 1984 ofisialmente komo “Dia di lucha pa libertat”.

E aña aki atrobe Asosiashon Promoshon Konsenshi Istóriko, ta organisá un grandioso konmemorashon na Parke Lucha pa Libertat na Ref riba: Djaweps 17 di ougùstùs di 7’or pa 10.30 di anochi.

Lo tin un programa edukativo kultural hopi variá ku debate fuerte rondó di e tema sentral pa e aña aki ku ta Sklabitut Mental. Públiko na un manera interaktivo por duna opinion tokante siguiente ponensianan:

Nos ta sufri di sklabitut mental? Tula a lucha pòrnada? Ta nos enseñansa ta kousa di esaki?
Tur esaki ta keda kombiná ku deklamashon, dramatisashon i músika di entre otro: Ebony Albertus, Nema.it-Last, Anakú-Kuumba, Godly Flow, Myrurgia Mutueel, Fifi Rademaker, Hebron Jansen, Rapper Zoinx, Grupo di Teater Kishikishi i Kondjemba.

Bini unu bini tur pa huntu nos debatí i tambe gosa di un programa kultural variá i asina duna homenahe na Tula i su luchadónan di 1795.

Inspirá pa e lucha di Tula nos ta bolbe invitá pueblo pa ban konmemorá viktoriosamente i ku firmesa:

“Dia di Lucha pa Libertat”,
Djaweps awor, 17 di ougùstùs, na Parke Lucha pa Libertat na Ref.

%d bloggers like this: