Advertisements

Ban debatí riba edukashon familiar na Kòrsou

Ban debatí riba edukashon familiar na Kòrsou

Willemstad – Despues di e konferensia di Taskforce Derechi di Mucha entre paisnan di Reino Hulandes na mart 2017, Kòrsou a lanta su Plataforma di Edukashon Familiar ku ta konsistí di representantenan di GO (Organisashonnan Gubernamental) i NGO (Organisashonnan No-Gubernamental). Den e plataforma a inkluí miembronan di instansianan ku ta enbolbí den edukashon familiar na Kòrsou huntu ku tur e instansianan ku a partisipá na e konferensia.
Instansianan ku lo traha huntu ta: SOAW, Sektor Famia i Hubentut, GMN, Departamentu Salú Hubenil,
Fundashon Bos di Hubentut, Sentro pa Informashon I Guia Edukashonal, Rooms Katholiek Centraal Schoolbestuur, Reda Sosial, Rema Uní, Fundashon Nos Tei pa Otro, Sifma, Yave, Sentro Otti Fanyete (Jeugd Centrale Curaçao), Ambulante Justitiële Jeugdzorg Curaçao, Gezins Voogdij Instelling, Perspektiva Sosten Integral, Skuchami, OWCS, Plataforma Training Creches i Plataforma schoolbesturen.
Un di e enkargonan ku a sali di e konferensia ta pa kada pais bini ku su vishon tokante edukashon familiar. Pa por kumpli ku e enkargo aki nos di Kòrsou ta bai kontinuá ku ehekushon di 8 debate tokante Edukashon Familiar.
E debatenan na Kòrsou, ku ta karga e nòmber ”Ban Papia Edukashon”, ta keda organisá dor di Sektor Famia i Hubentut ku koperashon di koleganan di tur e instansianan ariba menshoná. Lo presentá e datonan di e debatenan den e siguiente konferensia anual di TaskForce Derechinan di mucha, ku lo tuma lugá na mei di e aña benidero aki na Kòrsou.
Metanan di e debate “Ban Papia Edukashon” ta: kontinuá ku kòmbersashon i diskushon tokante edukashon familiar bou di edukadónan, profeshonalnan i mayornan; fortalesé sosten sosial den barionan; kompilá informashon i konosementu kon pa trese edukadonan den kontakto ku otro; normalisá papiamentu i diskushon riba edukashon familiar i duna un impulso pa nashonalmente papia riba edukashon familiar.
E debatenan lo keda organisá den e barionan Fuik, Gibraltar, Tera Korá, Brievengat, Soto, Rooi Santu, Steenrijk i Seru Fortuna. Ta start dia 4 di sèptèmber i ta terminá 25 di sèptèmber 2017.
SOAW ta invitá komunidat di Kòrsou pa duna su kontribushon dor di partisipá aktivamente na e debatenan. Edukadonan profeshonal i mayornan lo por debatí ku otro den un panel bou di guia di un lider riba e tema di edukashon familiar positivo i seif. Lo debatí segun regla stipulá adelantá i lo diskutí riba algun pregunta i ponensia. Partisipantenan por trese dilanti i kompartí ku otro nan opinion i nan punto di bista.
Den òktober 2017 lo presentá e resultado di e debatenan i un vishon di edukashon familiar pa Kòrsou.
Nos ta spera di por konta ku sosten di prensa pa promové e debatenan i na e momentu invitá mayor i edukadonan pa partisipá aktivamente.
Na nòmber di Sektor Famia & Hubentut di Ministerio SOAW
Prinsenstraat 86
Tel 434-0428

[pdf-embedder url=”https://kikoapasa.com/wp-content/uploads/KOMUNIKADO-debatenan-riba-edukashon-familiar.pdf” title=”KOMUNIKADO -debatenan riba edukashon familiar”]

Advertisements
%d bloggers like this: