​KORSOU RIBA LISTA DI 75 SIUDATNAN MAS PELIGROSO NA MUNDU I SERKA DI DRENTA DEN LISTA DI 50.

KORSOU RIBA LISTA DI 75 SIUDATNAN MAS PELIGROSO NA MUNDU I SERKA DI DRENTA DEN LISTA DI 50.

Minister di Hustisia ta bezig ku un Plan Kriminal of un Plan di Entiero?

Den un anochi tipiko kurasaleño, un di nos barionan popular a bolbe konose un berdadero masakre. Mei mei di un selebrashon e sombra di morto a yega i arasa ku 5 bida lagando 5 herido i un Pueblo den shock. I no ta prome biaha. Varios ta e intentenonan i e asesinatonan ku a sosede den aglomerashon di hende. Un Pueblo di shock ku ta wardando riba un respuesta konkreto ku akshonnan ku ta redusi e ola di kriminalidat ku ta asotando nos Pueblo. 

Su sigiuente dia e minister a bai hasi politika den parlamento i despues a organisa un rueda di prensa pa informa Pueblo ku e ta bezig ku un plan. E pregunta ta ki klase di plan e ta bezig kune. Pasombra bo no mester kaba di elabora un plan pa aktua. Si ta bon, e kuerponan di seguridat mester tin informashonan relevante riba e aktividat kriminal na Korsou. Es mas despues di dos luna (inkondishonalmente e suseso) i sabiendo nos grado di kriminalidat e minister di hustisia mester ta tin un plan kaba elabora. Kiermen no tin ekskus di no aktua di un forma strukural i planifika ku resultadonan konkreto. 

Mientra ku minister di hustisia ta hasi politika i ta morto na soño, Willemstad ta serka di drenta den lista di e 50 siudatnan mas peligroso na mundu pa 2017. Konforme un publikashon di News World e prome 5 siudatnan mas peligroso na mundu midi pa e rating di asesinato riba kada 100,000 habitante ta entre otro (1) San Pedro Sula- Honduras 171,20; (2) Caracas- Venezuela 115,98; (3) Acapulco -Mexico 104,16; (4) Joao Resseo – Brasil 79,41; (5) Distrito Central – Honduras 77,65. 

Siguiendo e publikashon e lastu 5 siudatnan riba e lista ta; (45) Tijuana – Mexico 29,90; (46) Macapa – Brasil 28,87; (47) Cucuta – Colombia 28,43; (48) Torreon – Mexico 27,81; (49) Medellin- Colombia 26,91; (50) Cuerna Vaca 25,45. 

Ku e lastu 5 asesinatonan Willemstad – Korsou ta registra  21 asesinato ku ta klok un rating di 24 asesinato pa kada 100,000 habitante ku no ta leu for di siudatnan manera Medellin ku 26,91 i Cuerna Vaca na Mexico ku 25,45 ku respektivamente ta number 49 i 50 riba e lista di e 50 siudatnan mas peligroso na mundu. Ta nifika ku si nos sigui riba e trend aki, na final di 2017 nos lo por drenta den lista di e 50 siudatnan mas peligroso na mundu. Mirando nos average di 24 asesinato pa kada 100,000 habitante  nos por tin sigur ku nos ta den lista di e 75 siudatnan mas peligroso na mundu kaba.  

Tur e siudatnan menshona, ta siudatnan un grado di pobresa ekstremo haltisimo i kaminda kartelnan di droga ta establese di un forma institushonal den komunidat.  Esaki ta nos kaso, minister? 

Ta inaseptabel, totalmente insolito ku na Korsou no tin ningun klase di seguridat den nos barionan i praktikamente nos por papia ku nos ta bibando den un guera di kartelnan urbano i e minister di hustisia ta sigui estudia e situashon, e ta trahando riba un plan. 

Kua plan ? Un Plan Kriminal of un Plan di Entierro pa nos pobalshon? Un okura total.

Sigui soña minister. Sigui hasi politika minister. Bon nochi.  

Carlos Monk

%d bloggers like this: