Minister Girigorie i sindikatonan a firma Plan Sosial

Minister Girigorie i sindikatonan a firma Plan Sosial

Minister di Hustisia señor Quincy Girigorie huntu ku sindikatonan ABVO, SAP i STrAF a firma djaweps 10 di ougùstùs durante un akto ofisial na Fòrti e Plan Sosial ku ta mará na e Functieboek 2009 di Sentro di Detenshon i Korekshon Kòrsou (SDKK). Di e forma aki e trayekto di reorganisashon di SDKK ta inisiá. Firmamentu di e Plan Sosial a tuma lugá despues ku tur sindikato ku tin representashon den Centrale Commissie van Vakbonden (CCvC) i minister di BPD, señor Armin Konket a firma un asina yamá ‘convenant’ durante un reunion di Centraal Georganiseerd Overleg in Ambtenarenzaken (CGOA).

Plan Sosial
Den e Plan Sosial ta deskribí regla i palabrashon en kuantu e proseso di reorganisashon di SDKK, na kua partidonan ta bai tene nan mes. Entre otro ta regla e posishon hurídiko di e trahadónan manera e personal di seguridat, wardadónan di prezu i otro empleadonan públiko ku ta forma parti di e instituto penitensiario aki. Den e Functieboek 2009 a deskribí tur e funshonnan eksistente i e funshonnan nobo. Tambe a revisá e deskripshon di funshon (‘functiebeschrijving’) i a yega den algun kaso na un otro ‘functieschaal’. Den e konvenio ku a sera relashoná ku e Plan Sosial, a regla entre otro ku lo no tin retironan obligatorio na SDKK komo konsekuensia di e reorganisashon.

Implementashon
E proseso di reorganisashon i e implementashon di e Functieboek 2009 ku lo inisiá denter di poko, lo drenta na vigor ku forsa retroaktivo te ku 10 di òktober 2010. Esaki teniendo kuenta ku e proseso pa yega na reorganisashon a kuminsá for di aña 2009. Implementashon di e reorganisashon na SDKK lo ta na enkargo di kuater komishon ku lo guia i sostené e proseso, esta ‘plaatsingscommissie’, ‘selectiecommissie’, ‘bezwarencommissie’ i ‘afrondingscommissie’. Minister di Hustisia señor Girigorie ta enkargá ku institushon di kada komishon. Gastunan di implementashon di e Functieboek te ku 2010 ta kalkulá na 3.5 mion florin.

Satisfakshon i seguridat
E implementashon di e Functieboek 2009 lo kontribuí na mas klaridat pa ku kontenido di trabou di kada trahadó loke na su turno lo trese trankilidat den SDKK. Ademas e satisfikshon i e seguridat ku e implementashon di e Functieboek aki ta trese kuné pa e trahadónan lo ta na bienestar di tantu e resosialisashon di e detenidonan i al final di e seguridat di pueblo di Kòrsou.

Logro
Komo ku un aspekto di e maneho di Minister Girigorie ta pa mehorá i fortifiká instansianan den e kadena hudisial, e ta hopi satisfecho ku e logro aki. Personal di SDKK a warda hopi tempu pa nan posishon hurídiko por keda reglá. Ku e logro aki Gobièrnu di Kòrsou ta manda un señal na trahadónan di prizòn ku ta balorá nan esfuerso i ta kere den nan kontribushon komo empleado di SDKK.

%d bloggers like this: