Advertisements

Turismo a generá 63 mion florin na yüni 2017 Tur merkado importante a realisá sifranan positivo na yüni

Turismo a generá 63 mion florin na yüni 2017 Tur merkado importante a realisá sifranan positivo na yüni

 

WILLEMSTAD – 8 di ougùstùs 2017 –Ofisina di Turismo di Kòrsou (CTB) ta raportá kresementu for di tur e merkadonan riba kual ta enfoká e esfuersonan di merkadeo. Hulanda, Alemania, Estado Unídos, Canada, Brazil, Colombia i Sürnam tur a presta bon durante yüni 2017. No opstante e resultado positivo di e merkadonan aki, luna di yüni a sera ku un bahada di 3%. Un total di 760 bishitante ménos a keda registrá na yüni kual a hiba na un total di 27.957 turista kompará ku 28.717 e mesun luna aña pasá. E bahada den kantidat di turista di estadia ta basá riba e echo ku e kantidat di turista for di Venezuela te ainda ta afektando e sifranan total. Un kaida di 46% a keda registrá na luna di yüni for di Venezuela. Aña pasá un total di 3.939 venezolano a bishitá nos pais miéntras e aña aki e kantidat total ta 2.113.

 

For di Europa a registrá un kresementu di 7% na yüni ku un total di 12.937 europeo ku a bishitá Kòrsou. Europa ta representá 46% di e total di turista risibí na luna di yüni. Hulanda a registrá 5% kresementu na yüni 2017. Un total di 10.175 turista hulandes a bishitá Kòrsou na yüni. For di Alemania e kresementu registrá ta 34%; na yüni un total di 1.489 turista di estadia a bishitá nos pais.

For di Nort Amérika por mira un kresementu di 8% na yüni 2017. Un total di 5.988 turista for di Nort Amérika a bishitá Kòrsou. Nort Amérika ta representá 21% di tur e turistanan ku a bishitá Kòrsou na luna di yüni. E kantidat di turista di estadia for di Estado Unídos a konosé un kresementu di 8% kompará ku aña pasá. Un total di 5.327 turista a keda registrá na yüni. E merkado di Estado Unídos ta aktualmente e di dos merkado ku ta produsiendo mas pa industria di turismo. Na komienso di aña e sifranan pa loke ta trata e merkado di Estado Unídos tabata tambaliá, finalmente ta mirando  ku e merkado ta mustrando un resultado faborabel pa di dos luna konsekutivo. Canada a krese ku 8% na yüni 2017. Kòrsou a risibí 661 turista prosedente for di Canada na yüni.

E prestashon di Venezuela ta wantando e sifra total di bishitante abou. Un total di 17% ménos turista a keda registrá for di Sur Amérika. E merkadonan sekundario den Sur Amérika esta Brazil, Colombia i Sürnam a registrá kresementu di respektivamente 4%, 36% i 11% na yüni 2017.

Na luna di yüni tambe a nota sifranan faborabel pa loke ta trata kantidat di anochi pa bishitante. E trènt ku bishitantenan ta kedando mas largu a kontinuá. Turistanan a keda un averahe di 8.6 anochi na yüni. Aña pasá e kantidat averahe di anochi pa persona tabata 8.1. E kantidat di anochi ku e turista a keda riba nos pais na yüni 2017 a konosé un subida di 4%. Un total di 241.290 anochi a keda registrá kompará ku 232.564 na aña pasá.

Sifranan generá for di e modelo ‘Turistika’ ta mustra ku na luna di yüni, sektor di turismo a generá un impakto direkto di 63 mion florin. Aña pasá e impakto direkto tabata 59 mion florin. Turistanan prosedente for di Europa ta responsabel pa 31 mion florin. Nort Amérika, Sur Amérika i otro regionnan a generá respektivamente 14.1, 13.8 i 4.1 mion florin.

E relashon entre e kantidat di anochi pa persona i e kantidat di turista di estadia ta mustra ku maske a registrá ménos yegada di turista, e anochi pa kada persona ta mustra un resultado ménos negativo ora tuma nota di e impakto ekonómiko direkto for di industria di turismo.

 

Advertisements
%d bloggers like this: